УИХ дахь АН-ын бүлгээс Ерөнхий сайд У.Хүрэлсүхэд шаардлага хүргүүллээ. Уг шаардлагад ХЗДХ-ийн сайд Ц.Нямдорж, Сангийн сайд Ч.Хүрэлбаатар нарыг огцруулах саналыг тавьсан байна. Шаардлагад “Монгол Улсын Ерөнхий сайд У.Хүрэлсүх таныг Ерөнхий сайдаар томилж, Ардын Засгийн танхим бүрдсэнээс хойш 6 сар гаруй хугацаа өнгөрлөө. Томилогдох үедээ амлаж байсан олон амлалт, хийж хэрэгжүүлсэн ажлын чинь үр дүнг үзэх хагас жил ард үлдлээ. Таны хариуцлага алдсан, хууль журам зөрчсөн хүмүүсийн толгойг илэхгүй, ард түмнээ өмгөөлдөг, авлигачидтай хатуу тэмцдэг Ерөнхий сайд байхыг хүсч байгаа гэсэн УИХ-ын индэр дээрээс хэлсэн үг биелээсэй хэмээн хүссэн ард түмний итгэл өдрөөс өдөрт алдарч байна.
Учир нь таны тэргүүлсэн танхимын зарим гишүүд, сайд нарын хууль зөрчсөн, ажлын хариуцлага алдсан, авлигын шинжтэй олон үйлдэл танай Засгийн газарт итгэх итгэлийг улам бүр алдагдуулж байгаа тухай олон нийт, хэвлэл мэдээллийн хэрэгслээр тогмтол хэлэлцэгдэж байна. Иймд дараах нэр бүхий сайд нарт бүрэн эрхийнхээ дагуу хариуцлага тооцож, огцруулах асуудлыг нэн яаралтай УИХ-д өргөн мэдүүлж шийдвэрлүүлэхийг УИХ дахь АН-ын бүлгээс тавьж байна гээд ХЗДХ-ийн сайд Ц.Нямдорж, Сангийн сайд Ч.Хүрэлбаатар нарыг огцруулах үндэслэлийг дурдсан байна.
Хэрвээ асуудлыг шийдвэрлэхгүй бол дараагийн улс төрийн алхмаа хийнэ гэдгээ шаардлагадаа онцолжээ.
Н.Энх