АТГ-ын шинэ даргыг тодруулах иргэдийн санал асуулгын дүн гарч, олон нийтэд зарлалаа. УИХ-ын дарга асанаас эхлээд хуулийн салбарынхан, иргэний нийгмийн байгууллагын төлөөлөл болсон 10 эрхэм Ерөнхийлөгчийн санаачилгаар АТГ-ын даргад нэр дэвшлээ. Авлигатай тэмцэх газрын дарга, дэд даргын албан тушаалд нэр дэвшүүлэх саналыг нийт 6405 иргэн ирүүлснээс АТГ-ын даргад 6382 иргэний саналаар 179 хүнийг, дэд даргад 5657 иргэний саналаар 317 хүнийг нэр дэвшүүлсэн байна.
Тэднээс хамгийн өндөр санал авсан хоёр хүний нэрийг АТГ-ын дарга, дэд даргаар томилуулахаар Ерөнхийлөгч Х.Баттулга УИХ-д өргөн барина. Ерөнхийлөгчийн албан ёсны вэб сайтад мэдээлснээр хамгийн өндөр саналыг ҮАБЗ-ийн ажлын албаны дарга Д.Даваа-Очир авчээ. Түүний араас ШШГЕГ-ын дэд дарга асан, хурандаа Ж.Батсайхан жагссан байна. Тэгэхээр Ерөнхийлөгч Д.Даваа-Очир, Ж.Батсайхан нарыг АТГ-ын удирдлагад санал болгох нь тодорхой болов.
Ерөнхийлөгч Х.Баттулга УИХ-ын хаврын чуулганы нээлтэд үг хэлэхдээ “АТГ-ын даргыг солино. Шинэ хүний нэрийг удахгүй оруулж ирнэ, та бүхэн хэлэлцэн шийдвэрлэж өгөөрэй” гэх хүсэлтээ “хэлэлцэхээс ч өөр аргагүй” гэх сануулгатай хамт өгсөн. Харин төрийн тэргүүний үгийг хууль тогтоогчид хэрхэн хүлээн авч, яаж шийдвэрлэх нь сонирхол татах асуудал.
АТГ-ын даргад нэр дэвшигчийг тодруулах санал асуулга ил тод явагдаагүй. Хэн хэн нэр дэвшсэн болоод хэдэн хүний санал авсан нь ч тодорхой. Зөвхөн иргэдийн санал гэх халхавчтай. Ер нь бол Ерөнхийлөгчийн хамгийн ойрын хүний нэр жагсаалтын нэгдүгээрт байгаад гайхах зүйлгүй гэсэн үг. Ерөнхийлөгч өөрөө Үндэсний аюулгүй байдлын зөвлөлийн тэргүүн. Харин ҮАБЗ-ийн ажлын албаны дарга бол түүний өөрийнх нь шууд харьяаны хүн. Тэгэхээр Ерөнхийлөгчийн хэлснээр парламент хэлэлцэхээс, дэмжихээс өөр аргагүйдвэл Ерөнхийлөгчийн хүн АТГ-ыг удирдана. Товчхондоо болох ёстой зүйл жамаараа болно гэсэн үг.
Авлигатай тэмцэх газрын даргад нэр дэвшигч нь төрийн албанд 15-аас доошгүй жил ажилласан, 45 нас хүрсэн, эрх зүйч мэргэжилтэй, удирдах болон мэргэжлийн ажлын мэдлэг туршлагатай, сүүлийн 5 жил улс төрийн албан тушаал эрхэлж байгаагүй байх учиртай. Харин дэд даргад нэр дэвшигч нь төрийн албанд 10-аас доошгүй жил ажилласан, эрх зүйч мэргэжилтэй, гүйцэтгэх болон мөрдөн байцаах ажлын мэдлэг туршлагатай, сүүлийн 5 жил улс төрийн албан тушаал эрхэлж байгаагүй зэрэг шаардлагыг хангасан байх ёстой юм.
Жагсаалтын эхэнд эрэмблэгдсэн эрхмүүд энэ шаардлагыг хангасан нь мэдээж. Ажилд нь томилчихоод эсвэл томилох хүнээ бэлдчихээд төрийн албаны сонгон шалгаруулалт зарладаг жишгээр явагдсан нэр дэвшүүлэх ажиллагаа УИХ-ын босгоор яаж давахыг харах л үлдлээ.
Авлигатай тэмцэх газрын дарга, дэд даргад:
| д/д | Овог | Нэр | Албан тушаал |
| 1 | Давааням | Даваа-Очир | ҮАБЗ-ийн ажлын албаны дарга |
| 2 | Жанжаа | Батсайхан | ШШГЕГ-ын дэд дарга асан, хурандаа |
| 3 | Баянмөнх | Билэгт | ЦЕГ-ын дарга асан |
| 4 | Нэргүй | Ууганбаяр | ЭЦГ-ын дарга асан |
| 5 | Дашнамжил | Цогтбаатар | Монголын Улс төрийн хэлмэгдэгсдийн холбооны тэргүүн |
| 6 | Өлзийбат | Энхтөр | ЦЕГ-ын дарга асан |
| 7 | Гэлэг | Баасан | АТГ-ын дэргэдэх олон нийтийн зөвлөлийн дарга |
| 8 | Зандаахүү | Энхболд | Ерөнхийлөгчийн тамгын газрын дарга |
| 9 | Базарсад | Жаргалсайхан | Буян ХХК-ны захирал |
| 10 | Дашпүрэв | Пүрэвбаатар | Өмгөөлөгч |
Б.Учрал
| Уншиж байна |