Хөдөлмөрийн мөлжлөгийг халж, шударга үнэлэмжийг тогтоохыг шаардсан ажил хаялтын өмнөх суулт дөрөв дэх өдрөө төв талбайд үргэлжилж байна. Суултад эрүүл мэнд, шинжлэх ухаан, боловсрол, хөдөлмөрийн салбарынхан нэгджээ. Тэд 2018 оны II улиралд багтааж, үндсэн цалин 50-иас доошгүй хувиар нэмэх шаардлагыг тавьж байна. Мөн Ерөнхийлөгчид хандан хөдөлмөрийн мөлжлөгийг таслан зогсоох тухай Ерөнхийлөгчийн зарлиг гаргаж өгөх хүсэлтийг тавьсан. Бас Төрийн албаны нэмэлт өөрчлөлт оруулан, цалингийн дээд доод хэмжээг тогтоох итгэлцүүр тогтоож өгөхийг Ерөнхийлөгчөөс хүсчээ.
Суултын үеэр Эрүүл мэндийн ажилтны үйлдвэрчний эвлэлийн холбооны дарга Б.Мягмар “Хийх ажилгүйдээ биш ажил хийгээд ядуураад байгаа учраас мянга мянган ажилчдаа төлөөлж, энд ирсэн.
Эрүүл мэндийн салбарын цалинг нэмэх эрх Эрүүл мэндийн сайдад байдаггүй. Хөдөлмөр нийгмийн зөвшлийн улсын гурван талт хэлэлцээрээр шийддэг. Бид хоёрдугаар улиралд багтаан үндсэн цалинг 50-иас доошгүй хувиар нэмэгдүүлэх шаардлагыг тавьж байгаа. Энэ шаардлагаас ухрахгүй.
Бид улс төр хийдэг хүмүүс биш.Та нар бохир улс төрөө өөрсдөө хий. Эрүүл мэнд, шинжлэх ухаан, боловсрол, соёл урлагийн салбарын ажилтнууд боолын хөдөлмөр эрхэлж байхад улс төрийн башир аргаараа нухчин дарах гэж байгаа төрийн түшээ байгаад гайхаж байна.
Бидний тэмцэл өдөр өдрөөр чангарах болно” хэмээн мэдэгдлээ.
Б.Учрал