МАХН-ынхан хоёр хуваагдаад багагүй хугацаа өнгөрч байна. Ээлж дараалан хоёр талд их чуулганаа хийж, нэг хэсэг нь УИХ-ын гишүүн О.Баасанхүүг намын даргаараа сонгосон бол нөгөө хэсэг нь Н.Энхбаяр даргыгаа улираан томилоод буй юм.

Ингэж хуралдахдаа МАХН-ын дүрэм болон удирдлагыг шинэчилж, бүртгүүлэхээр Дээд шүүхэд хандсан ч хэдэнтээ буцаад байна. Хамгийн сүүлд болсон шүүх хурлын үеэр МАХН-ынхан муудалцаж, зодолдсон гэх мэдээлэл бий.

Энэ талаар өнөөдөр УИХ-ын гишүүн О.Баасанхүүгийн талынхан хэвлэлийн бага хурал хийлээ. МАХН-ын гишүүн Г.Бямбасүрэн “Дээд шүүхийн хурлын танхимд манай намын дарга нэртэй яваад байгаа нөхдүүд УИХ-ын гишүүн О.Баасанхүү рүү дайрч давшилж, доромжилсон. УИХ-ын гишүүний халдашгүй байдалд халдаж, зодсон ёсзүйгүй үйлдэл болсон. Энэ үйлдлийг манай намынхан жигшиж зэвүүцэж байна.

Э.Эрдэнэжамъян, Уламбаяр нар О.Баасанхүү гишүүн рүү дайрч давшилж, элэг рүү нь өшиглөж зодсон. Элгэндээ доргилт авсан учраас гадагшаа явж эмчлүүлэх шаардлагатай болсон. Маргааш Солонгос явна” гэх мэдээллийг өглөө.

Б.Учрал