УИХ-ын гишүүн Д.Сумъяабазартай цаг үеийн асуудлаар ярилцлаа.
-“Тавантолгой”-н 30 хувьд IPO гаргана гэсэн ерөнхий мэдээлэл яваад байна. Үүнийг тодруулахгүй юу?
-Одоогоор ерөнхий мэдээлэл хэлнэ. Өнөөдөр “Тавантолгой”-н хувьцааны ханш 933 байгаа. Ер нь УИХ-ын 39, 40 дүгээр тогтоолоор 20 хувийг нь гадаадын дотоодын хөрөнгийн биржээр, 10 хувийг нь аж ахуйн нэгжүүдээр, 20 хувийг нь иргэддээ гээд нийт 50 хувийг нь хуваарилсан байсан. Ер нь 1.9 их наяд төгрөгийн хөрөнгийг баталгаажуулаад бүртгэсэн байгаа. “Тавантолгой” эргэлтэд орсноор 1072 ширхэг хувьцааны үр өгөөжийг хүртэнэ. Бид цаг хугацааны хувьд яаравчилж байгаа. Нийгэмд “Тавантолгой” төслийг эхлүүчихээсэй гэсэн хүлээлт байгаа. Улс төрийн байр суурийн хувьд талууд олон улсын стандартад нийцүүлж IPO 30 хувьд гаргах шийдвэрт хүрсэн. Авто зам, төмөр зам гээд дэд бүтцийн асуудал гээд яригдаж байгаа. Ажлуудыг үе шаттай хийнэ.
-Цаг хугацааны хувьд УИХ-д хэзээ өргөн барих бол?
-ҮАБЗ-өөр оруулж тогтоолын төсөл танилцуулна. Үүний дараагаар УИХ-д танилцуулах учиртай. Төмөр зам, цахилгаан станцын ТЭЗҮ хариуцсан сайдуудад бүгд бэлэн байгаа. Мөн устай холбоотой ТЭЗҮ-д БОАЖЯ Хөхморьт гэсэн төсөл оруулахаар болсон байна лээ.
-Хаврын чуулган завсарлахаас өмнө "Тавантолгой"-н төсөл чуулганаар хэлэлцэгдэж амжих болов уу?
-Амжилгүй яах вэ. Амжуулахын төлөө ажиллаж байна.
-“Оюутолгой”-д гуравдагч компани гарч ирээд Монголын талын 34 хувийг хуваалцаж байна яриа гарлаа. Энэ үнэн үү?
-Одоогоор “Оюутолгой”-н 34 хувь Монголдоо байгаа. Ямар нэг гаднын компани хуваалцаагүй.
-“Оюутолгой”-д гуравдагч компани гараад ирсэн юм биш үү?
-“Indrigold” эхнээсээ байсан компани. Энэ компанитай хамтарч Оюутолгойн бүлэг ордод хайгуулж хийгээд явж байсан. Одоо Оюутолгой” дахь манай 34 хувиас хуваалцаж байгааг мэдэхгүй юм. Стратегийн орд газруудын талбайтай холбоотой ажлын хэсгүүд тийм дүгнэлт гаргасан байсан. Оюутолгойн бүлэг орд газрын хил хязгаарыг тогтоох тухай гээд “Indrigold”-ын талбай руу орсон гэх зүйл байдаг. Үүнийг шалтгалтаар хамтарсан ажлын хэсэг тогтооно.
-Өмнөх УИХ-ын ажлын хэсэг “Оюутолгой”-д шалгалт хийгээд, гурван жилийн хугацаанд 3 сая ам.долларын зөрчил илрүүлсэн илрүүлсэн. Энэ зөрчлийг Дубайн гэрээгээр Монголын талд өр болгоод хувиргасан гэдэг асуудал байна. Энэ талаар...?
-Далд уурхайн бүтээн байгуулалтын талаар төлөвлөгөөг Дубайд очиж гарын үсэг зурсан. Гарын үсэг зурсан хүмүүс нь саатуулагдан шалгагдаж байна. Хууль хяналтын байгууллага шалгаад, гэм буруутай эсэх асуудлыг хэлэх байх. “Оюутолгой” төсөл манай улсын нийгэмд үзүүлж байгаа нөлөөлөл, ажлын байр бий болгож байгаагаараа нөлөөлөл их. Энэ төслийг бид цаашдаа яаж үр ашигтай авч явах вэ гэдгийг тооцох хэрэгтэй. Нэг өнцгөөс нь харж, буруутгах гээд байж болохгүй. Хэн нэгэнд буруу өгөөд, хэргийг тохох гэж байгаа байдлаар битгий хандаасай. Стратегийн орд газрыг эдийн засгийн эргэлтэд оруулахад хүнд хүнд шийдвэрүүдийг тухайн үеийн Засгийн газрын тэргүүнүүд гаргаж байсан. Одоо “Оюутолгой төсөл явдгаараа явж байна. Цаашдаа ч улс нийгэмд үр өгөөжөө өгөөд явна. Монгол талаас энэ талаар шахаж ажиллаж байгаа. Оюутолгойн удирдлагууд ч Засгийн газраас тавьсан шаардлагуудыг биелүүлэх байх гэж бодож байна.
-Татвартай холбоотой маргаан ямар шатандаа байна вэ?
-Засгийн газрын зүгээс “Оюутолгой”-той холбоотой татварын асуудал дээр өөр өөрсдийн гаргасан шийдвэрүүдээ хамгаалсан байр суурьтай байгаа. Энэ нь нэлээн хүч, хугацаа шаардсан ажил. Ер нь татвар, санхүүгийн асуудлаас болж улс орон, компани ч хохирол амсдаг. Бид ч Монгол Улсынхаа Засгийн газрын байр сууриа хамгаалж явна. Тиймээс ажлын хэсгүүд хуралдаад зохих шийдвэрээ гаргаад явж байгаа. Зургадугаар сарын сүүл хавьцаа энэ асуудал дахин яригдах байх.
Н.Энх