Сурагчид өлсөх эсвэл “хор” худалдаж авах хоёрхон л сонголттой.

Ерөнхий боловсролын сургуулийн сурагчид хичээлдээ явахдаа эцэг, эхээсээ хоолны мөнгөнд 500-5000 мянган төгрөг авч явдаг нь Нийслэлийн боловсролын газар болон есөн дүүргийн боловсролын хэлтсийн мэргэжилтнүүдийн хийсэн хөндлөнгийн үнэлгээгээр тогтоогджээ. Гэвч сурагчид бүгд ижил төрлийн хоол худалдан авч иддэг байна. Пирошки эсвэл ороомог... Сургуулийн цайны газарт эдгээрээс өөр хоолны сонголт байхгүй. Үүнээс татгалзвал хажуугийн түргэн хоолны газраар бэлэн гоймон чануулж идэж болно. Гэтэл эдгээр нь бүгд хориглосон, хориотой хүнс.Тэгэхээр сурагчид өдөржин өлсөх эсвэл “хор” худалдаж авах хоёрхон л сонголттой.

Манай улсад Эрүүл мэндийн сайдын тушаалаар “Тусгай дэглэмтэй хүн, нярай, бага насны болон цэцэрлэгийн хүүхэд, ерөнхий боловсролын бага ангийн сургуулийн сурагчдад зориулсан хүнсний түүхий эд, бүтээгдэхүүн, хоол үйлдвэрлэлд тавих шаардлага, түүнийг тогтоох журам”-ын гуравдугаар хавсралтанд хоол үйлчилгээнд хэрэглэхийг хориглох хүнсний түүхий эд, бүтээгдэхүүний жагсаалтыг баталсан байдаг. Үүнд сурагчдын хамгийн түгээмэл худалдаж авдаг пирожки багтсан байдаг.

Пирожки нь  хямд үнэтэй, илчлэг өндөртэй тул сурагчид ихээр хэрэглэх шалтгаан болдог аж. Уг бүтээгдэхүүний тосны агууламж 21.5 гр, давс 1.2 гр байгаа нь эрүүл бус хүнсний бүтээгдэхүүний ангилалд хамааруулж байгаа ба сургуулийн орчинд худалдаалахыг хязгаарлах шаардлагатай бүтээгдэхүүнээр нэрлэжээ. Пирожки шарахад удаан хэрэглэсэн ургамлын тос нь чанар нь муудаж транс тос болон хувирдаг байна. ДЭМБ-аас хүүхдийн хүнсэнд транс тосыг хэрэглэхийг хориглодог бөгөөд эрүүл мэндэд өндөр эрсдэлтэй тос гэж үздэг.

Гэтэл сурагчид өдөр бүр транс тосонд хайрч болгосон пирошки идэж байгаа нь эрүүл мэндээ хохирооч буй явдал. Авахгүй байя гэхэд сургуулийн цайны газарт үүнээс өөр ходоодоо “борлуулах” хоол, хүнс худалдахгүй. Өлсөхгүйн эрхэнд хүүхдүүд эрүүл бус хооллож байна. Улмаар эрүүл мэндээ хохироож байна.

Сурагчдын үдийн хоолны тэжээллэг чанар дээр анхаарал тавьсаар ирсэн. Одоо харин эрүүл хүнс хэрэглэх, давсны хэрэглээг багасгах, тосонд хуурч, шарсан хоол хүнс сургууль орчимд худалдаалахгүй байх тал дээр анхаарах цаг иржээ.

Г.Тэгшсүрэн