Үндэсний соёл амралтын хүрээлэн буюу бидний нэрлэж заншсанаар хүүхдийн паркийн эргэлддэг пуужин буюу "Сансрын хөлөг" тоглоом /2018.06.13/ доош унаснаар хүүхдүүд гэмтсэн байна.
Сүхбаатар дүүргийн цагдаагийн 1-р хэлтэст 15.13 цагийн үед Үндэсний соёл амралтын хүрээлэнд "Сансрын хөлөг" гэх тоглоомонд хүүхэд дарагдлаа гэсэн дуудлага ирсний дагуу тус цагдаагийн хэлтсээс хэргийн газарт ажиллаж эхэлжээ.
Тоглоом дээр байсан хүүхдүүдэд эрүүл мэндийн яаралтай тулсамж үзүүлэх ажлыг зохион байгуулсан бөгөөд хүүхдийн амь нас эрсдээгүй болохыг Цагдаагийн байгууллагаас мэдээллээ.
Энэхүү ослын улмаас дөрвөн хүүхэд гэмтэж, гэмтсэн дөрвөн хүүхдийг ГССҮТ-д шилжүүлжээ. Одоогоор Нийслэлийн мэргэжлийн хяналтын байгууллага болон Цагдаагийн байгууллагаас хамтарсан шалгалтыг хийж байна. Урьдчилсан байдлаар уг тоглоом нь насжилт өндөртэй, хуучирсан гэдэг дүгнэлтийг гаргажээ.
Үндэсний соёл амралтын хүрээлэн нийт 22 тоглоомтой юм байна. Үүнээс "Сансрын хөлөг" тоглоом нь найман хүний багтаамжтай аж. Тоглоом эвдэрч, доош унах үед бүхээгт хэдэн хүүхэд байсныг одоогоор тогтоогоогүй байгаа юм байна.
Сүхбаатар дүүргийн мэргэжлийн хяналтын газраас хэргийн газарт шалгалт хийж, маргааш /2018.06.14/ албан ёсны тайлбар хийнэ гэдгийг мэдэгдлээ.
Г.Тэгшсүрэн
Уншиж байна |