Дауны синдромтой, 12 настай, Москва хотын сурагч Ангелина Макарова Оросын нийслэлийн “Лужники” цэнгэлдэх хүрээлэнд ДАШТ-ийг нээхээр болжээ. Энэ талаар Оросын Тусгай олимпийн Ерөнхийлөгч Юрий Смирнов мэдээллээ.

“Тоглолтын эхний цаг эхлэхээс өмнө Ангелина Макарова үндэсний шигшээ багийн ахлагчидтай хамт дагалдах шүүгч болон талбайд гарч, ДАШТ-ин эхний тоглолтонд гүйцэтгэх багуудын үүргийг шүүгчийн хамт тодорхойлох юм”- хэмээн Юрий Смирнов хэвлэлийнхэнд мэдээлжээ.

Эх сурвалжийн дамжуулснаар, Ангелина Макарова Москвагийн нэгэн сургуулийн тавдугаар ангийн сурагч, спортоор идэвхитэй хичээллэдэг нэгэн гэнэ. Тэрбээр өсвөрийн усанд сэлэлтийн тамирчдын хоёрдугаар зэрэгтэй юм байна. Түүнчлэн Дауны синдромтой хүмүүсийн оролцдог бүх Оросын болон хотын тэмцээнүүдэд ялалт байгуулж, шагналт байр эзлэж байсны дээр Тусгай олимпийн шагналт байранд шалгарч байжээ.

Ангелина “Сайн үйлсийн төлөөх хөлбөмбөг” нэртэй гэрэл зургийн үзэсгэлэнгийн гол баатар болж байсан юм. Энэхүү үзэсгэлэн өдгөө Шереметьево олон улсын нисэх буудал дээр гарч байгаа бөгөөд ирэх сарын 31 хүртэл олны хүртээл болох юм байна. Ангелина Дауны синдромтой бусад хүүхдүүдийн хамтаар Оросын шигшээ баг, хөлбөмбөгийн клубуудын тоглогчид, хөлбөмбөгийн домог болсон тамирчид, дасгалжуулагчид, спортын тайлбарлагчдын хамтаар зураг авахуулж, ийнхүү үзэсгэлэнгийн гол баатар болжээ.

Б.Учрал