Баянзүрх дүүргийн 79 дүгээр сургуулийн хөлбөмбөгийн талбайд тоглож байсан тавдугаар ангийн хүүхэд амь насаа алдсан хэрэг /2018.06.18/ гарсан. Тус сургуулийн хөлбөмбөгийн талбайн хаалганы төмөр унаж, тухайн талбайд тоглож байсан 11 настай хүү дарагдаж нас барсан билээ.
Хүү хөлбөмбөг тоглох дуртай, ирээдүйд алдартай хөлбөмбөгчин болохыг мөрөөддөг байсан гэдэг. Тиймээс “Хөлбөмбөгийн хорхойтнууд” цахим группын залуус болон “Аавуудын групп” нэгдэн золгүй байдлаар амиа алдсан хүүгийн гэгээн дурсгалд зориулж хүүгийн тоглодог байсан хөлбөмбөгийн талбайг стандартын дагуу засварлаж өгөхөөр болжээ. Мөн хүүгийн амь насаа алдсан хөлбөмбөгийн талбайд дурсгалын самбар байрлуулах аж.
Түүнчлэн “Хөлбөмбөгийн хорхойтнууд” группын залуус хүүгийн ар гэрт нь очиж, нэг сая төгрөгийн хандив цуглуулсанаа хүлээлгэн өгсөн байна.
Бүлгэмийн гишүүд "Танай гэр бүлд тохиолдсон гашуудал зовлонг Хөлбөмбөгийн Хорхойтнууд бүлгэмийн гишүүд бид чин сэтгэлээсээ хуваалцаж буйгаа илэрхийлье. Бид бол хөлбөмбөгт дуртай сэтгэлээрээ нэгдэн нэг бүлгэм болцгоосон хүмүүс юм. Г.Мөнххөлөг дүү маань ч гэсэн хөлбөмбөгт дуртай байсан тул манай бүлгэмийн гишүүд зүгээр гашуудаад өнгөрөх бус ямар нэгэн байдлаар биечлэн, бодитоор тус болохыг хүссэн. Ганц хүн биш бид олуулаа нэгдэн сэтгэл гаргаж, боломжоороо буяны хандив цуглууллаа. Ганхөлөгийн Мөнххөлөг дүү минь бурханы орноос биднийгээ харж, дуртай хөлбөмбөгөө тэнгэрийн оронд тоглож буй биз ээ. Ум сайн амгалан болтугай” хэмээн нийтэлжээ.
Г.Тэгшсүрэн
Уншиж байна |