Малайзын Ерөнхий сайд асан Нажаб Разак өнгөрсөн 2015 онд томоохон авлигын дуулианд нэр холбогдсон түүхтэй. Тухайн үед түүнийг Малайзын Засгийн газрын мэдлийн сан болох “1MDB”-аас хувийн данс руугаа их хэмжээний мөнгийг шилжүүлэн авсан хэмээн буруутгаж, сөрөг хүчин уг санг Разак 2008 онд хувийн зорилгоор байгуулсан гэгддэг.

Түүний 2014 оныг хүртлэх хугацаанд уг сангаар дамжуулан нийт 4.5 тэрбум ам.долларыг угаасан хэмээн буруутгажээ.

Шинээр сонгогдоод буй Ерөнхий сайд Махатхир Мохамад тангарагаа өргөж, үүрэгт ажлаа хүлээн аваад л улсынхаа эд баялгыг цөлмөж, ард түмнийхээ итгэлийг хөсөрдүүлсэн Назаб Разакийг хуулийн дагуу шалгахыг үүрэгдсэн юм.

Цагдаагийнхан Разакийн Куала Лампур хот дахь гэрийг битүүмжлэн, нэгжлэг хийсэн билээ. Энэхүү нэгжлэгийнхээ үеэр үнэд хүрэх зүйлсийг хураан авчээ.

Тэгвэл дээрх ажиллагааны үеэр хураан авсан эд хөрөнгийн хэмжээ нь 273 сая ам.доллароор үнэлэгдсэн талаар өнөөдөр цагдаагийнхан мэдэгджээ.

Разакийн гэрээс нийт 12 мянган ширхэг үнэт эдлэл, эдгээрийн хамгийн үнэтэй нь 1.6 сая ам.долларын хүзүүний зүүлт гэнэ. Мөн 567 брэндийн цүнх, 30 сая ам.доллартай тэнцэх бэлэн мөнгө, 423 ширхэг брэндийн цаг, “Versace”, “Gucci”, “Cartier”, “Dior” брэндийн 234 ширхэг брэндийн нүдний шил, 2200 ширхэг бөгж, 2800 ширхэг хос ээмэг, 1600 ширхэг энгэрийн тэмдэг, 14 ширхэг титэм хураан авсан талаараа Цагдаагийн дарга Синг мэдэгдлээ.

Тэрбээр “Малайзын түүхэн дэх хамгийн том авлигын дуулиан” гэж хэлжээ.

Разак мэдүүлгийнхээ үеэр дээр дурьдсан зүйлсийн заримыг нь бэлгэнд авсан хэмээн мэдэгдсэн байна.

Б.Дэлгэрцэцэг