Хойд Солонгосын залуу удирдагч Ким Чен Ун өнгөрөгч амралтын өдөр улсынхаа томоохон үйлдвэрүүдтэй биечлэн танилцаж, удирдлагуудад нь заавар зөвлөгөө өгчээ. Удирдагчийн уг ажлын айлчлалын талаарх гэрэл зургуудыг тус улсын төрийн мэдлийн “KCNA” агентлаг цахим хуудастаа нийтэлжээ.

Эдгээр гэрэл зургуудын дунд залуу удирдагчийн өмд нь шороо болсон мөн нүүр нь улайсан гэх мэт янзлаагүй зургууд нийтлэгдсэн нь олны анхаарлыг татсан байна. Тус сайт ихэвчлэн удирдагчийнхаа инээмсэглэсэн, зааварчилгаа өгч буй үеийн зургуудыг нийтлэдэг юм.

Тэрбээр эхнэр, Тэргүүн хатагтай Ри Сол Жугийн хамтаар гоо сайхны бүтээгдэхүүн үйлдвэрлэдэг үйлдвэрт зочилсон байна.

Ким Чен Ун энэ жил анхны айлчлалаа хийхээс гадна олон жилийн өмнөөс дайсагнасан харилцаатай байсан АНУ-ын Ерөнхийлөгч Дональд Трамптай биечлэн уулзсан билээ.

Б.Дэлгэрцэцэг