БНХАУ-ын эрх баригчид сая гаруй Уйгар иргэнийг баривчлан, хорьсон гэх мэдээллийг эрс үгүйсгэсэн талаар “Ройтерс” агентлаг мэдээллээ.
Женев хотноо зохион байгуулагдсан НҮБ-ын чуулга уулзалтын үеэр Германд төвтэй Дэлхийн Уйгарчуудын Конгресс олон улсын байгууллага “БНХАУ, Уйгар иргэдийг ямар ч шалтгаангүйгээр баривчилж, тамлан зовоож байна” гэж мэдэгдсэн билээ. Хоёр өдөр үргэлжилсэн уг уулзалтад Бээжин 50 гаруй төлөөлөгчөө илгээсэн юм.
Баригдсан уйгарчууд өмгөөлөгч авах зэрэг хуулийн ямар ч үйлчилгээ авах эрхгүй, хүндхэн нөхцөлд байгааг тус байгууллага НҮБ, хандан уламжлав. Үндэсний цөөнх, исламын шашинтай уйгарчуудыг шахан гадуурхах бодлого Бээжин баримталсаар ирсэн.
Бээжин “Уйгарчуудыг баривчлан, тамлан зовоосон ямар ч хууль бус үйлдэл гараагүй. Уйгарчууд бусдын адил эрх чөлөөтэй, амар амгалан амьдарч байгаа” гэв.
НҮБ-ын Арьс, үндсээр алагчлахыг устгах Зөвлөлийн Дэд дарга Гэй МакДугалл “Бээжин мэдэгдлээ баримт нотолгоогоор батлан харуул. Мөн олон улсын шинжээчдийг Шинжаан Уйгарт нэвтрүүлж, нөхцөл байдалтай биечлэн танилцах зөвшөөрөл олго. Бид бүх зүйлийг нүдээр харах учиртай” гэж хатуухан мэдэгдлээ.
Бээжингийн эрх баригчид өнгөрсөн онд насанд хүрсэн бүх уйгар иргэний хурууны хээ, ДНК-ийн мэдээллийг цуглуулан авсан билээ. Уг үйлдлээ Бээжин “Энэ бол хууль ёсных. Ирээдүйд гарах эрсдлээс урьдчилан сэргийлэх хамгийн зөв алхам” гэж тайлбарлажээ.
Мөн уйгар эрчүүдийг сахлаа ургуулах, эмэгтэйчүүдийг нь гивлүүр зүүхийг хориглосон юм.
Б.Дэлгэрцэцэг
Уншиж байна |