Засгийн газраас төрийн албан хаагчдын цалинг нэмэгдүүлэх шийдвэр гаргаж, эхний ээлжинд хүнд нөхцөлд ажилладаг хэмээн үзэж багш нарын цалинг нэмэгдүүлэхээр болсон. Гэвч цалингийн нэмэгдлийг “бага байна” хэмээн эсэргүүцэж, өчигдрөөс буюу есдүгээр сарын 3-ны өдрөөс нийслэлийн зарим сургуулийн багш нар ажил хаялт зарлаад байна.

Багш нарын ажил хаятыг дэмжих нэгэн байхад, шүүмжлэх хэсэг ч бий. МҮЭХ-ноос 2018 онд төрийн албан хаагчдад нэг удаа олгох ёстой байсан урамшууллын  56.4 тэрбум төгрөгийг нийт төрийн албан хаагчдад хуваагаад найман хувиар цалин нэмэгдүүлэх нэрийдлээр олгох гэж байна. Иймд МҮЭХ энэ шийдвэрийг хүлээж авах боломжгүй тул есдүгээр сарын 1-нээс боловсролын салбарын ҮЭ байгууллагууд ажил хаялтыг зохион байгуулна” хэмээсэн. Хэлсэндээ ч хүрч цөөнгүй сургуулийн багш нар ажил хаясан бол өнөөдрөөс цэцэрлэгийн багш нар мөн ажил хаялтад нэгджээ.

Цалингаа голж, ажлаа хаясан багш нарын оронд ажиллах хүсэлтэй ажилгүй хэдэн багш нар өнөөдөр хэвлэлийн хурал хийлээ. Үндсэндээ багш нарын ажил хаялтыг багш нар эсэргүүцэж буй нь энэ. Хүүхэд төрүүлж гэртээ суусан, улсын сургуульд тэнцэж ажиллаж чадахгүй байгаа ажилгүй багш нар фэйсбүүк групп нээж нэгдсэн аж. Тэд багш нарын ажил хаялттай холбогдуулан фэйсбүүк группдээ хэлэлцүүлэг өрнүүлж, төлөөлөл нь өнөөдөр хэвлэлийн хурал хийж ажил хаясан багш нарыг буруутгав.

Ажилгүй байгаа багш нарыг төлөөлж хэвлэлийн хурал хийсэн нөхдүүд “Би ажилгүй байгаа багш. Одоогоор 12 сургуулийн багш нар ажил хаяж, 20 мянган сурагч, 40 мянган эцэг эхчүүд хохирч, нийгэмд эмх замбараагүй байдал үүсээд байна. Багш нар ёс зүйгүй үйлдэл гаргаж байна. Би бага ангийн багш мэргэжилтэй. Багш нар 600 мянган төгрөгийн цалин авдаг, түүнийгээ бага гэдгийг мэдэж байгаа ч хичээлийн эхний өдөр ажил хаяж байгааг эсэргүүцэж байгаа юм. Тиймээс ажилгүй байгаа, ажил эрхлэхийг хүсч байгаа багш нарыг бидэнтэй нэгдэж, ажил хаялт зарласан багш нарын оронд ажиллахыг уриалж байна. Би бололвсролын салбарт 10 жил ажиллаж байгаад 2014 оноос хүүхдээ хараад гэртээ сууж байгаа. Улсын сургуульд ажилд ороход хэцүү байдаг. Багшийн шалгалтаа өгчихсөн.

Ажил хаялт хийх гэж байгаа бол нэгдсэн журмаар зохион байгуулалттайгаар, цаг үеэ олж хийх хэрэгтэй. Сурагчид бие биенээ санан догдлоод есдүгээр сарын 1-нд нээлтэн дээрээ уулзсан. Үнэхээр ажил хаях байсан бол есдүгээр сарын 1-нд хичээлийн шинэ жилийн нээлт хийж хүүхэд сурагчдыг догдлуулах хэрэг байгаагүй” зэрэг зүйлсийг хэлж байлаа.

Тэдэнтэй цуг эцэг, эхийн төлөөлөл ч ирсэн байлаа. Нийслэлийн БГД-ийн 77, 78 дугаар сургуульд хүүхдүүд нь сурдаг эмэгтэй “Манай хүүхдүүдийн сургуулийн багш нар ажил хаяаагүй байгаа. Гэхдээ ажил хаяна гээд яриад байгаа. Багш нар ажил хаялт зохион байгуулахаар хүүхдүүдийн эрх ашиг зөрчигдөж байна” хэмээв.

Уг нь хүүхдүүдийнх нь сургуулийн багш нар ажил хаячихаагүй л юм байна. Гэвч тэр өнөөдрийн хэвлэлийн хуралд оролцон ийн хэлсэн нь хэн нэгний явуулга “шантааж” болохыг харууллаа. Хэвлэлийн хурал хийсэн ажилгүй багш нар  чин зүрхнээсээ ажил хаялтыг эсэргүүцэж биш, хэн нэгэн тэднийг “сумлаад” тавьчихсан гэмээр. Тэдний ард сөрөг хүчин, популизм хийгч хэн ч байж болох юм.

Г.Сүрэн