Засгийн газрын хэрэг эрхлэх газрын дарга Г.Занданшатар МҮЭХ-ны удирдлага болон багш нарын ажил хаялтыг зохион байгуулах шуурхай ажлын хэсгийн төлөөлөлтэй өнөөдөр уулзсан. Тус уулзалтаар Засгийн газрын зүгээс багш нарын асуудлыг судлах ажлын хэсэг байгуулах санал гаргасан юм. Харин энэ саналд үйлдвэрчний эвлэлийн байгууллагаас нэлээн болгоомжтой хандаж, ажлын хэсэгт ажиллах эсэхээ гишүүдээсээ асууна, олонхийн шийдвэрээр асуудалд хандана хэмээн БШУҮЭХ-ны дарга Ж.Батзориг мэдэгдээд байсан.
Уг асуудлаар шуурхай ажлын хэсэг хуралдаж, Засгийн газрын ажлын хэсэгт багтахаас татгалзжээ. Өөрөөр хэлбэл багш нар Засгийн газарт дахин хууртахгүй гэж үзсэн байна.
Өнгөрсөн хавар багш нар ажил хаяхад Засгийн газраас ажлын хэсэг байгуулан, ажил хаялтыг зогсоосон. Сангийн сайд Ч.Хүрэлбаатараар ахлуулсан тус ажлын хэсэг багш нарын цалингийн нэмэгдлийг шийдвэрлүүлж чадаагүй. Тиймээс энэ удаа багш нар Засгийн газарт цаг хожих боломжийг олгохгүйгээр шийджээ. Ингэснээр багш нарын ажил хаялт хугацаагүй хэвээр байх нь.
Б.Учрал