11:30 цагт:
Нийслэлийн МАН-ын хорооны бага хурал үргэлжилж байна. Хуралдаанд нийслэлийн МАН-ын даргын үүрэг гүйцэтгэгч С.Батболд илтгэлээ тавилаа. Үүний дараагаар хурлыг хаалттай горимд шилжүүлж, хэвлэлийнхнийг гаргасан юм. Бага хурлаар нийслэлийн МАН-ын даргыг сонгоно. МАН-ын Удирдах зөвлөлөөс нийслэлийн МАН-ын даргад С.Батболдын нэрийг оруулж байгаа юм. Харин заалнаас УУХҮ-ийн сайд Д.Сумъяабазар, НИТХ-ын дарга С.Амарсайхан нарын нэрийг дэвшүүлэх сурагтай.
10:40 цаг:
Нийслэлийн МАН-ын бага хурал үргэлжилж байна. Хуралд нийслэлийн МАН-ын хорооны даргын үүрэг гүйцэтгэгч С.Батболд илтгэлт тавилаа. Тэрбээр:
-МАН-д сонгогчид итгэл хүлээлгэж байгааг парламентын сонгуулиар харуулсан. НИТХ-ын 75.5 хувь буюу 34 мандатыг МАН-аас нэр дэвшигч ялалт авсан. Ард түмэн сонгогчдоос эдийн засгийн хүндрэлийг даван туулж, ирээдүйгээ даатгаж болох улс төрийн хүчин гэж үнэлсний илрэл. НИТХ-ыг сонгох сонгуульд хүчээ нэгтгэж ажилласан НАШБ-ууддаа баяр хүргэж, амжилт хүсье. Бид УИХ-ын болон орон нутгийн сонгуульд ялалт байгуулсан ч Ерөнхийлөгчийн сонгуульд ялагдал хүлээсэн нь бодит үнэн.
Ирэх сонгуулиудад амжилт үзүүлэх нь бидний эрхэм зорилго юм. Миний бие нийслэлийн МАН-ын хорооны дотоод ажилтай нухацтай танилцан, мөрийн хөтөлбөрийг хэрэгжүүлэхэд хэрхэн ажиллах талаар санал бодлоо хуваалцаж байна. Нийслэлийн МАН-ын хороо намын цөм нь болсоор ирсэн. Өрийн дарамт бий болсон үед мөрийн хөтөлбөрөө хэрэгжүүлэх хүндхэн цаг үетэй тулсан. Бид шалтаг тоочин суух цаг байхгүй. Үр ашиг, алсыг харсан бүтээн байгуулалтыг хэлэлцэж суугаа маань та бидний ажлын бодит үр дүн юм.
Эдийн засгийн хүрээ багтаамжийг өргөтгөж,хөрөнгө оруулалт,бүтээн байгуулалтыг нэмэгдүүлэхийг хичээн ажиллаж байна. Цаг үе биднээс мэдрэмж, хурд, бодит ажлыг шаардаж байна гэлээ.
Нийслэлийн МАН-ын бага хурлыг Г.Мөнхбаяр даргалж байна
09:50 цаг:
Нийслэлийн МАН-ын хорооны бага хурал Хүүхдийн ордонд болж байна. Бага хурлыг даргалагчийг сонгох санал хураалтыг нээлттэй явууллаа. Нийслэлийн МАН-ын даргын үүрэг гүйцэтгэгч С.Батболд хурлын даргалагчаар УИХ-ын экс гишүүн Г.Мөнхбаяр, орлогчоор Г.Цогцэцэг нарыг санал оруулав. заалнаас УИХ-ын гишүүн Х.Нямбаатараар даргалуулах санал гаргалаа. Ингээд хурлын төлөөлөгчдийн дунд нээлттэй санал хураалт явуулсан юм. Нийт 333 төлөөлөгчөөс 173 нь буюу олонхи нь Г.Мөнхбаярыг хурал даргалагчаар, орлогчоор Г.Цогцэцэгийг сонгохыг дэмжжээ. Заалнаас зарим төлөөлөгч энэ санал хураалтыг эсэргүүцэж байгаагаа илэрхийлж байлаа.
Нийслэлийн мандатын комиссын илтгэл эхэнд явна. Илтгэлийг С.Мөнхчулуун дарга танилцуулна. Дараагаар нь нийслэлийн Засаг дарга бөгөөд Улаанбаатар хотын захирагч, нийслэлийн МАН-ын хорооны даргын үүрэг гүйцэтгэгч С.Батболд илтгэл тавих юм. Төлөөлөгчид хэлэлцэх асуудлаа баталлаа.
Нийслэлийн МАН-ын бага хурал эхэллээ
09:20 цаг:
Нийслэлийн МАН-ын 34 дүгээр бага хурал Хүүхдийн ордонд эхэллээ. Хуралдаанд 333 төлөөлөгч оролцож байгаа юм байна. Нийслэлийн МАН-ын бага хуралд МАН-ын дарга, Ерөнхий сайд У.Хүрэлсүх амжилт хүссэн мэндчилгээ ирүүлжээ.
Нийслэлийн МАН-ын бага хурлыг даргалан явуулахаар нийслэлийн экс Засаг дарга Г.Мөнхбаяр, орлогч даргаар ЭМ-ийн экс сайд Г.Цогцэцэг нарын нэрийг дэвшүүллээ. Заалнаас бага хурлын даргад УИХ-ын гишүүн Х.Нямбаатарыг санал болгож байгаагаа хэллээ. Мөн нийслэлийн Сонгинохайрхан дүүргийн төлөөлөгч Х.Нямбаатараар даргуулахыг дэмжиж байгаагаа илэрхийлээд, “жүжиг тоглохгүй “, “Тооллогын комиссыг дүүргүүдийн намын дэд даргаар бүрдүүлэхийг хүсч байна. Нийслэлийн намын хороо гэж сонгуульд оролцдоггүй, дүүргүүд бүрдүүлж байгаа” гэсэн саналыг төлөөлөгчид хэлж байлаа.
Н.Энх