БНХАУ, Шведийн харилцаа хурцдаад байна. Энэ талаар Британийн “ВВС” агентлаг мэдээллээ.
“Шведийн эрх баригчид санаатайгаар Хятадын эсрэг өдөөн турхиралт хийж, ялгаварлаж байна” хэмээн БНХАУ-ын Гадаад хэргийн яамны хэвлэлийн төлөөлөгч Генг Шуанг мэдэгдлээ.
Учир нь Шведэд байгаа хятадууд ямар ч шалтгаангүйгээр ХОХИРОГЧ болох нь ихэссэн гэнэ.
Стокгольм хотын цагдаагийнхан энэ сарын эхээр нэгэн зочид буудлаас 50 орчим насны эрэгтэй, эмэгтэй хоёр хятадыг хүч хэрэглэн буудлаас гаргасан аж. Уг үйл явдлыг гэрчлэх видео бичлэг нийгмийн сүлжээнд байрших үед БНХАУ, ШВЕД хоёрын харилцаа өмнө нь байгаагүйгээр ХУРЦДАВ.
Бичлэгт хохирогч эр англиар “Биднийг зүгээр л хөнөөчих” гэсэн бол эмэгтэй нь “Туслаач” хэмээн хятадаар хэлж буйгаар гарчээ. Жуулчдын эсрэг хүч хэрэглэсэн явдлаа цагдаагийнхан “Тэд шаардлага биелээгүй, эсэргүүцэл үзүүлсэн” гэж тайлбарлалаа. Зочид буудлын эзэн хэвлэлийнхэнд “Хятад гэр бүл буудлын өрөө захиалсан өдрөөсөө өөр өдөр ирсэн. Тэдэнд “өрөө байхгүй” гэхэд уурлаж, хүчээр нэг өрөө рүү орж, явахаас татгалзсан” гэж ярьжээ.
Хятадын твиттер гэгддэг вейбо сүлжээнд уг бичлэг байршсаны дараахан хятадууд дургүйцлээ илэрхийлэн, уг асуудалд эрх баригчдаа анхаарлаа хандуулахыг шаардсан байна.
“БНХАУ, Швед улс олон жилийн турш найрсаг, дотно харилцаатай байсан. Швед манай улсын иргэдийн эсрэг хүч хэрэглэсэн явдлыг зүгээр өнгөрүүлэхгүй” хэмээн Бээжин хатуухан мэдэгдэв. Уг мэдэгдлийн дараахан Швед дэх БНХАУ-ын Элчин сайд “БНХАУ-ын иргэний эрхийг ноцтой зөрчсөн” гэлээ.
Тус бичлэгээс болж БНХАУ, Шведийн харилцаа МУУДСАН. Шведийн “SVT” телевиз хятадуудыг доромжилсон өнгө аястай нэвтрүүлгийг цацсан нь ГАЛ ДЭЭР ТОС нэмэв. Хөтлөгч шоуны эхэнд хятадуудад өгөх бяцхан зөвлөмж байна хэмээжээ. Тэрбээр үргэлжлүүлэн “Хятадууд хоол идэж байхдаа олон нийтийн газар хүндээр бие засахгүй байх хэрэгтэй. Мөн хятадууд Стокгольм хотын гудамжаар нохойгоо хөтөлж яваа иргэдийг өдрийн хоолоо авч явна хэмээн андуурахгүй байх хэрэгтэй” гэж хэлжээ.
Нэвтрүүлэгт гарч буй дүрс, үг хэллэгийг Бээжин эрс буруутгаад “БНХАУ-ын эсрэг энэ мэтээр бүдүүлэг үг хэллэг ашиглах нь хууль бус” хэмээв. Нэн даруй Шведийн эрх баригчдыг уучлал гуйхыг шаарджээ.
Шведэд хятадуудыг үзэн ядах, ялгаварлан гадуурах үзэл дэлгэрч байгаа нь Бээжингийн “толгойг өвтгөж” байна.
Хятадуудыг санаатайгаар доромжилсон “SVT” телевизийн захирал Томас Холл “Энэ бол зөвхөн шоу нэвтрүүлэг. Энэ алдаа байлаа. Бид буруу сэдвээ сонгон авчээ. Энэ бүхэн санаатай өдөөн турхирсан зүйл огт биш. Биднийг уучлаарай” гэжээ.
Телевизийн удирдлага уучлалт гуйсан ч Бээжингийн уур хилэн, гомдол тайлагдахгүй байна.
Бээжин шведийн цагдаагийнхан болон телевизийн удирдлагуудыг “арьс өнгөөр ялгаварлан гадуурхсан” хэмээн буруутгаж байгаа. Швед улс бол өнгөт арьстан, араб, еврейчүүд мөн ижил хүйстнүүдийг хүртэл хүлээн зөвшөөрдөг.
Хятадыг доромжилсон “#SwedishTVShowInsultsChinesePeople” нэвтрүүлгийг 34 сая хүн үзжээ.
Хятадууд нэвтрүүлгийн дараа цахим ертөнцөд “Швед биднийг доромжлох хэрэггүй” гэх кампанит ажил өрнүүлж, тус улс руу зорчихгүй, мөн тус улсын “IKEA”, “H&M”, “Volvo” компанийн бүтээгдэхүүнийг худалдан авахгүй байхыг уриаллаа.
Ганцхан энэ асуудлаас болж Бэээжин, Шведэд хилэгнээгүй хэмээн барууны хэвлэлүүд бичих болжээ. Түвдийн оюун санааны удирдагч XIV Далай Лам энэ сарын эхээр Шведэд шашны айлчлал хийсэн нь Бээжинг бухимдуулсан гэв.
Б.Дэлгэрцэцэг