УИХ-ын чуулганы нэгдсэн хуралдаанаар ҮХЦ-ийн дүгнэлтийг  хэлэлцэж байна. УИХ-ын 62 дугаар тогтоол Үндсэн зөрчсөн гэж ҮХЦ дүгнэжээ. Хэнтий аймгийн УИХ-ын сонгуулийн 42 дугаар тойрогт явагдах санал хураалтын товыг тогтоосон УИХ-ын тогтоолыг ҮХЦ  хууль зөрчсөн гэж үзэн түдгэлзүүлсэн юм.

Байнгын хороогоор дээрх асуудлыг хэлэлцээд хүлээж авах боломжгүй гэж үзсэн юм. ҮХЦ-ийн хуралдаанд УИХ-ыг төлөөлж Төрийн байгуулалтын байнгын хорооны дарга Д.Лүндээжанцан оролцсон юм. ҮХЦ-ийн дүгнэлтийг Цэцийн гишүүн УИХ-ын чуулганд танилцуулж болдог, харин УИХ-ын гишүүний асуултад хариулдаггүй заалттай аж. Тиймээс хэлэлцэж байгаа асуудалтай холбогдуулан гишүүдийн асуултад Төрийн байгуулалтын байнгын хорооны дарга Д.Лүндээжанцан хариуллаа.

УИХ-ын гишүүн Б.Пүрэвдорж:

-МАН их хэмжээний зээл авчихаад нэг ч бүтээн байгуулалт хийсэнгүй. У.Хүрэлсүх Хэнтий аймагт очих нүүргүй болчихоод сонгуулийг явуулсангүй. Тиймээс жолоочийнхоо ээжээр энэ өргөдлийг өгүүлсэн. Шүүмжлэл сонсож сураагүй улсууд  шүү, та нар. МАН-ыг сонгогчдын өмнө заавал аваачина. У.Хүрэлсүхийг сонгогчдын өмнө заавал аваачина. Үүний төлөө АН ажиллана.

УИХ-ын гишүүн Д.Тэрбишдагва:

-Өнөөдөр Хэнтийн 42 дугаар тойргийн 10 сонгогч төлөөлөлгүй байна. УИХ-аар улсын төсөв хэлэлцэж байна. Ард түмний төлөөллийг хэн орлох вэ?

-УИХ бол хууль зөрчөөгүй УИХ-ын нөхөн сонгуулийг зургадугаар сарын гурав дахь долоо хоног, аравдугаар сарын эхний долоо хоногт явуулна гэж заасан байдаг. Сонгуулийн хууль бол Үндсэн хуулийн заалттай өөрчлөлт хийж болно. Тиймээс Төрийн байгуулалтын байнгын хороо УИХ-ын, Ерөнхийлөгчийн, НИТХ-ын сонгуулийн хуулийн анхны хувилбарыг гаргасан.

Ер нь тэддүгээр тойргийн гишүүн гэж байдаггүй. УИХ-ын гишүүн гэж ярьдаг. Манай нөхцөлд гаргаж ирэх нь сонгогчдын эрх, гарсан хойноо нийт сонгогчдын эрх ашгийг хамгаалдаг. Бид тойргоос сонгогдож гарч ирснээс бус төсвийг 3 сая иргэний эрх ашгаар ярих юм.

УИХ-ын гишүүн С.Чинзориг:

-Сонгуулийг шударга явуулахад сонгуулийн ардчиллыг бэхжүүлэх шаардлагатай. Ард түмний сонголт эцсийн сонголт байна гэдэг. Сонгуулийг будилаантуулаад байгаа СЕХ-ны удирдлагуудыг солих шаардлагатай.

УИХ-ын гишүүн О.Баасанхүү:

-ҮХЦ-ийн шийдвэрийг хүлээж авахгүй гээд байна. Миний ойлгож байгаагаар хууль зөрчсөн эсэхийг УИХ тогтоогоод, ганцхан өгүүлбэрийг л солино. Гэтэл дургүйд хүчгүй гэдэг шиг л болоод байна. Үүнд ҮХЦ буруутай болоод байна. Тухайн үедээ МАН, АН Сонгуулийн хуулийг өөрчилсөн. УИХ-ын гишүүд хууль зөрчөөгүйг ойлгож байна. Дараа нь ҮХЦ бидэнд боломж өглөө. Гэтэл энэ боломжоос яагаад Төрийн байгуулалтын байнгын хороо түдгэлзээд гүйгээд байгаа юм бэ. Сонгуулийн хууль хэлэлцэхээр та нар өөрсдийн эрхийн төлөө хуйвалдана. 42 дугаар тойргийн сонгуулийг явуулахыг хүсч байна уу?

-ҮХЦ-ийн дүгнэлтийг хүлээж авбал ээлжит бус сонгуулиар бие даагчид ямар хугацаа тавигдах вэ, нөхөн сонгуульд ямар хугацаа тавигдах вэ гэдэг асуудал яригдаж байна. Энэ ондоо хуулийн өөрчлөлтийг ярина. УИХ хуулийн өмнө хүлээсэн үүргээ биелүүлж нөхөн сонгууль хийнэ.

Чуулганы хуралдаан үргэлжилж байна. 

Н.Энх