Байгаль орчин, аялал жуулчлалын сайд Н.Цэрэнбат агаарын бохирдлын асуудлаар өнөөдөр /2018.10.16/ сэтгүүлчдэд мэдээлэл хийлээ.
Тэрбээр “Бид өнгөрсөн жилийн хугацаанд 78 нам даралтын уурын зуухыг нэгдсэн дулаанд холбож чадлаа. Ингэснээр нийт өнгөрсөн жил хэрэглэж байсан түүхий нүүрсний хэрэглээг 10 гаруй хувиар бууруулж байгаа гэсэн үндсэн тооцоо гаргасан. Мөн 41 мянга 963 айлыг шөнийн тарифыг ашиглаад цахилгаанаар халаах эрчим хүчний дэд бүтцийг бий болгож өгсөн байгаа. 2019 онд гэрийн янданг индүкцийн аргаар бүрэн шаталтыг дэмжих төхөөрөмжийг суурилуулна. Мөн 3000 уурын зууханд пм төрлийн тортог утааг шүүгч шүүлтүүрийг суурилуулна” гэв.
Орчны бохирдлыг бууруулах үндэсний хорооны ажлын хэсгийн ахлагч, эрчим хүчний төрийн нарийн бичгийн дарга З. Мэндсайхан “Индүкцийн аргаар утааг бүрэн шатаах технологийг Монгол залуучууд санаачилж оюуны бүтээлийн эрхийг авсан. Энэ асуудлаар тухайн үеийн Шадар сайд У.Хүрэлсүхэд танилцуулсан. Сүүлийн үед цахим хуудсуудаар индүкцийн аргаар яндан дээр шүүлтүүр байрлуулна. Үүнийг дагаад угаартах зэрэг эрсдэл үүсэх магадлал өндөр гэж ярьж байна. Энэ бол шүүлтүүр биш юм. Утаа гэдэг бол нүүрс болон бидний хэрэглэж байгаа энгийн түлшний дутуу шаталтаас гарч байгаа тоосонцор буюу бидний нэрлэж заншсанаар утаа юм. Тоосонцорыг бүрэн шатаах технологи л юм. Индүкц бол богино хугацаанд өндөр хэмжээний энергийг бий болгодог. Тиймээс ямар нэг байдлаар угаартах эрсдэл гарахгүй.
Мөн 100 мянган айлд туршилт хийх гэж байна гэнэ. Төр ард, иргэддээ туршилт хийх зүйл байхгүй. Агаарын бохирдлын 80 хувийг гэр хороолол бий болгож байна. Тиймээс бид энэ цэгийг сонгож аваад энэхүү айлууд дээр үүнийг хэрэгжүүлж, утаатай тэмцэхээр ярьж байна" гэлээ.
Г.Сүрэн