Израйлийн армийнхан өнгөрсөн амралтын өдөр Газын зурвасын зүүн өмнөд хэсэгт агаараас цохилт өгсөн талаар "Ройтерс" агентлаг мэдээллээ.

Уг цэргийн ажиллагааны үеэр хүүхдүүд амиа алдсан гэнэ. Палестины Эрүүл мэндийн яам агаарын цохилт өгсөн бүс нутгаас 11-14 насны гурван палестин хүүхдийн цогцос олжээ.

Түргэн тусламжийнхан гамшгийн бүсээс хүүхдүүдийн цогцсыг эмнэлэгт авчирсан байна. 

Израйлийн армийнхан дээрх цэргийн ажиллагаа болон хүүхдүүдийн аминд хүрсэн шалтгаанаа "Хүүхдүүд хилийн хамгаалалтын хашлагад тэсрэх бөмбөг байршуулж, Израйль цэргүүдийн аминд хүрэхийг санаархсан" гэж тайлбарлажээ. 

АНУ-ын Ерөнхийлөгч Дональд Трамп өнгөрсөн онд эртний түүхт Иерусалем хотыг Израйлийн нийслэл хэмээн хүлээн зөвшөөрсөн юм.

Уг шийдвэрийн дараа палестинчууд эсэргүүцлээ илэрхийлсэн билээ. Өнгөрөгч оны гуравдугаар сард дэгдсэн зөрчилдөөний үеэр  200 гаруй палестинчууд амиа алдаж, 10 мянга гаруй хүн шархадсан байна. 

Б.Дэлгэрцэцэг