12:50 цаг:
УИХ-ын чуулганы нэгдсэн хуралдаанаар 2019 оны улсын төсөвт тавьсан хоригийг хэлэлцэхээр байлаа. Асуудлыг хэлэлцэх үед чуулганы хуралдаанд ЕТГ-ын дарга З.Энхболд орж ирээгүй байв. Хэлэлцэж байгаа асуудалтай холбогдуулан гишүүд үг хэлэв.
УИХ-ын гишүүн Д.Хаянхярваа:
-Би Засгийн газрыг огцруулах санал гаргасан нь Ерөнхийлөгчийн засаглалыг гацааж, парламентын засаглалаа авч үлдэх гэсэн юм. Үндсэн хуулийн бус арга хэрэглэж байна. Энэ парламентын засаглалаа авч үлдэхийн тулд энэ Засгийн газрыг огцруулах ёстой. Ерөнхийлөгч, Засгийн газар нийлж, парламентыг гацааж байна. Монгол Улсын Ерөнхийлөгч, Ерөнхий сайд аа төрөөр тоглож болно.
УИХ-ын гишүүн Ж.Мөнхбат:
-Монгол Улсын Ерөнхийлөгч 2019 оны улсын төсөвт хориг тавьчихаад хэлэлцэх гэхээр Засгийн газрын гишүүд картаа сугалаад гарлаа. УИХ-аар бойкот тавьдаг боллоо. Өөрөө хориг тавьчихаад хэлэлцэх гэхээр сайд нарыг хуралдаанд оролцуулахгүй байна. Ө.Энхтүвшин, Ц.Даваасүрэн, Ч.Хүрэлбаатар сайд нар чуулганы хуралдаанд орж ирчихээд картаа сугалаад аваад явлаа. Өөрөө бүлгийн хуралдаанд оруулж, хоригийг хүлээж авахгүй гэхээр сайд нараа хуралдаанд оролцуулахгүй, бойкот хийж байна. Би энэ Ерөнхийлөгчийн хоригийг дэмжинэ гэж бодоод сууж байна. Засгийн газраасаа эхлээд дүрэмгүй тоглож байгаа юм бол УИХ-аа одоо тараая. Монголын төр өнөөдөр Засгийн газрын хэдэн сайд нараас болж шившгийн түүхийг бичиж үлдээж байна.
УИХ-ын гишүүн О.Баасанхүү:
-Ерөнхийлөгчийн хоригийг эсэргүүцэж байна гэж үзэж байна. Учир нь бүхэлдээ хориг тавьсан гэсэн үг. Энэ хуулийг бүхэлд нь хориг тавина гэдэг нь хуулийг хүчингүй болго гэсэн үг. Энэ хуулийг хүчингүй болговол цаашдаа Монгол төр гацаад орно. Хориг тавих санаа байгаа юм уу, төрийг гацаанд оруулах санаа байгаа юм уу. Өнөөдөр УИХ-ын чуулганы нэгдсэн хуралдаанд Ерөнхийлөгчийн тавьсан хоригийг хэлэлцэхэд хуралдаанд танилцахгүй байна. Тиймээс УИХ-ын Дэгийн дагуу "Хоригоо танилцуулаагүй байгаа нь хоригоосоо татгалзаж байна гэж үзээд дэмжихгүй явъя" гэсэн горимын санал гаргаж байна гэлээ.
ҮХЦ-ийн дүгнэлтийг хэлэлцлээ
12:05 цаг:
УИХ-ын чуулган хуралдаан товлосон цагаасаа хоёр цаг хойшилж эхэллээ. Хуралдааны эхэнд Үндсэн хуулийн цэцийн 14 дүгээр дүгнэлтийг хэлэлцэв.
Монгол Улсын Үндсэн хуулийн цэц 2018 оны 11 дүгээр сарын 14-ний өдөр Дунд суудлын хуралдаанаараа Сонгуулийн тухай хуулийн 159 дүгээр зүйлийн 159.4 дэх хэсэгт “Орон нутгийн хурлын төлөөлөгчийн бүрэн эрх нь хүлээн зөвшөөрөгдсөний дараа орон нутгийн хурлын төлөөлөгчийг нэр дэвшигчийнх хувьд нэрийн жагсаалтаас хасах тухай сонгуулийн хорооны шийдвэр гарсан бол тухайн төлөөлөгчийн мандат нь хүчингүй болж, бүрэн эрх нь дуусгавар болно.” хэмээн хуульчилсан нь Үндсэн хуулийн холбогдох заалтыг зөрчсөн эсэх тухай маргааныг хянан хэлэлцлээ.
Сонгуулийн дүнд байгуулагддаг Улсын Их Хурал болон орон нутгийн иргэдийн Төлөөлөгчдийн Хурлын сонгуульд нэр дэвшигчдийн сонгуулийн хууль тогтоомж зөрчсөн үйлдэлд нь хүлээлгэх хариуцлагыг илтэд ялгавартайгаар, тухайлбал Улсын Их Хурлын сонгуульд нэр дэвшин сонгогдож тангараг өргөн, бүрэн эрх нь хүлээн зөвшөөрөгдсөн Улсын Их Хурлын гишүүнд хүлээлгэх энэ төрлийн хариуцлагыг хуульчлаагүй нь Үндсэн хуулиар баталгаажсан шударга ёс, тэгш байдлын зарчмыг алдагдуулсан, Үндсэн хуулийн Арван дөрөвдүгээр зүйлийн 1 дэх хэсгийн “Монгол Улсад хууль ёсоор оршин суугаа хүн бүр хууль, шүүхийн өмнө эрх тэгш байна” гэсэн заалтыг зөрчсөн байна хэмээн үзсэн юм.
М.Энхболд: Хориг хэлэлцэхэд сайд нар байлцах ёстой
11:30 цаг:
УИХ-ын чуулган товлосон хугацаанаасаа 1.30 цаг өнгөрсөн ч хуралдаан эхлээгүй байна. Гишүүдийн ирц бүрдээгүй учир УИХ-ын дарга М.Энхболд гишүүдийг тэр дундаа Засгийн газрын гишүүдийг хуралдаандаа орж ирэхийг шаардсаар байна. "Өнөөдрийн хуралдаанаар 2019 оны улсын төсөвт Ерөнхийлөгчийн тавьсан хоригийг хэлэлцэнэ. Хоригийг хэлэлцэхэд Засгийн газрын гишүүд байлцаж, гишүүдийн асуултад хариулах ёстой. Учир нь төсөв хэлэлцэж байна гэсэн үг" хэмээн сайд нарын нэрсийг дуудаж байна.
Гишүүдийн ирц одоогийн байдлаар 48 хувьтай байгаа юм.
М.Энхболд: Г.Занданшатар дарга сайд нараа дуудаж, чуулганы ирц бүрдүүл
11:05 цаг:
УИХ-ын чуулганы нэгдсэн хуралдаан ирц бүрдээгүйн улмаас эхлээгүй, товлосон хугацаанаасаа нэг цаг гаруй өнгөрөөд байна. УИХ-ын дарга М.Энхболд "Ирцэнд 35 гишүүн орсон байна. Гишүүд хуралдаандаа орж ирнэ үү, ирц бүрдүүлэх гэж нэг цаг хүлээж байна. ЗГХЭГ-ын дарга Г.Занданшатар сайд нараа хуралдаанд ирүүлж, ирц бүрдүүл" хэмээлээ. Одоогийн байдлаар чуулганы ирц 46.7 хувьтай байгаа юм.
Ирц бүрдээгүйгээс чуулган эхлээгүй байна
10.30 цаг:
УИХ-ын чуулганы нэгдсэн хуралдаан өнөөдөр 10.00 цагт эхлэх товтой ч, ирц бүрдээгүй байна. УИХ-ын дарга М.Энхболд УИХ дахь МАН-ын бүлгийн дарга Д.Тогтохсүрэн, АН-ын бүлгийн дарга Д.Эрдэнэбат нарыг гишүүдийн ирцээ бүрдүүлэхийг шаардаж, МАХН, бие даагч гишүүдийн ирц 100 хувь байгааг онцоллоо.
Гишүүдийн ирцийн байдал одоогоор 40 хувьтай байгаа юм. УИХ дахь АН-ын бүлгээс Д.Эрдэнбат, Б.Пүрэвдорж нарын гишүүд чуулганы танхимд ирсэн байна. УИХ дахь МАН-ын бүлгийн шинэ дарга гишүүд рүү залгаж, хуралдаандаа ирэхийг шаардаж байгаа бололтой.
Н.Энх