Монгол Улсын Ерөнхий сайд, МАН-ын дарга У.Хүрэлсүх УИХ-д суудалгүй намын дарга нартай уулзлаа. Уулзалтад МУУН, МНН, ИЗНН, Монгол хүний төлөө нам зэрэг нийт 14 улс төрийн хүчний удирдлагууд ирсэн байв. Улс төрийн намын удирдлагууд Ерөнхий сайд У.Хүрэлсүхэд өөрсдийн байр суурь, саналаа илэрхийлсэн юм.
МУУН-ын дарга н.Батболд:
-Улс төрийн намууд нийгэмд үүсээд байгаа нөхцөл байдлыг ярилцлаа. 14 нам улс төрд цэвэрлэгээ хийх нь зүйтэй гэж тохирлоо. Таны эхлүүлсэн өөрчлөлт шинэчлэлтийг нийгмийн захиалга гэж бид дүгнэсэн. Шинэчлэлийг дэмжиж явна. Бид тогтолцооны хямралаас гарахгүйгээр цаашаа явахгүй.
ИЗНН-ын дарга Д.Ганхуяг:
-Өнөөдөр эгзэгтэй цаг үед бид уулзаж байна. Улс төрийн намуудын хувьд улс үндэстний эрх ашгаас илүү эрх ашиг гэж байх ёсгүй. Том том асуудлыг шийдэх улс төрийн эр зориг гаргахаа мэдэгдэж, намууд дамжсан бүлэглэлийн асуудалд цэг тавих байр суурийг Ерөнхий сайд баримталж байгаа учраас бид таныг дэмжиж байна. Бид Засгийн газрыг огцуурлахгүй эсэргүүцэж мэдэгдлээ гаргасан. Асуудал УИХ-д байна. Цаашдаа Засгийн газрыг тогтвортой ажиллуулж, ард түмэн түр хурлаа хуралдуулж ажиллавал ямар вэ гэсэн санал хэлж байна.
Монголын хүний төлөө намын дарга н.Бат-Ялалт:
-Та өчигдөр Төрийн ордноос хулгайч нартай тэмцэх тухай ярилаа. Улстөрчид хулгайчтай тэмцэх биш хууль хяналтын байгууллагынхантай хамтарч хулгайчтай тэмцдэг болъё. Монголын хүний төлөө нам иргэний хяналтыг хэрэгжүүлж байна. Ард түмний хяналтын төвийг Монголын хүний төлөө нам нээж байна. Таны эхлүүлж байгаа шинэчлэлийн талд бид хамтдаа байна. Нийгмийг талцаж хуваасан, бусдын нөлөөнд автсан хариуцлагагүй мэдэгдэл их байна. Эв нэгдлийн төлөө улс төрийн намууд нэгдэхийг уриалж байна.
Иргэний хөдөлгөөний намын дэд дарга н.Сүхжаргалмаа:
-Ард түмэн нийгмийн шударга ёсыг хүсч байгааг бид бүгдээрээ мэдэж байгаа. Тэвчээр нь барагдаж байна. Шударга ёсыг тогтоохын тулд хууль тогтоогчид, эрх баригчид төр, түмэндээ гай учруулж болохгүй. Таны эхлүүлсэн ажил, гаргасан санаачлагыг бусад намтайгаа нэгдээд дэмжээд явна.
Монгол Улсын Ерөнхий сайд У.Хүрэлсүх:
-Өнөөдөр бид асуудлаа хэлэлцэх завшаан тохиолдож байна. МАН-ын язгуур эрх ашиг бол ард түмний язгуур эрх ашиг. МАН Монгол Улсын хөгжил дэвшлийн төлөө ажиллах ёстой. Энэ эрх ашигтай нийцэж ажиллаж чадахгүй бол МАН биш. Та бүхэн ч улс орны сайн сайхны төлөө, Үндсэн хуулиа шинэчилж сайжруулахын төлөө олон жил тэмцэж ирсэн хүмүүс. Би урьд нь дийлэнх нь Шадар сайдын ажил хийж, гай зовлон, гамшиг ослын төлөө тэмцэж байсан. Та бүхний хэлж байгаатай санал нэг байна. Улс орон, үр хүүхдийнхээ төлөө зориг гарган ажиллах, эсвэл хэд гурван хүний сандал ширээнд нь тавтай суулгах гэсэн хоёр зам байсан. Би эхнийхийг нь сонгож байна. Шинэчлэл бол мөнхийн процесс. Улс орон шинэчлэгдэж өөрчлөгдөж байна. Ард түмний хүсэлт мөрөөдөл ондоо болсон. Засч залруулах зүйл маш их байгаа. Улс орныхоо сайн сайхны төлөө хамтдаа зүтгэе гэж байгаад маш их баярлаж байна. Улс төрийн намуудын дэмжлэгээс илүү том дэмжлэг гэж үгүй. Засгийн газрын хувь заяаны асуудал маргааш, нөгөөдөр шийдэгдэнэ. Ард иргэд Засгийн газрыг тогтвортой ажиллаж, улс төрийн шинэчлэлийг зоригтой хийгээсэй гэж хүсч байгаагаас биш Засгийн газраа унагах бодолтой хүн цөөхөн байгаа. Тийм учраас би ард түмний өргөн дэмжлэг дээр яваа Засгийн газар гэж бодож байна.
Үндсэн хуулиа өөрчлөх та бүхэнтэй санал нэг байна. Би парламентын засаглалыг дэмждэг хүн. Ардчилсан нийгмийн амин сүнс бол зөвшилцөл. Нийгмийн зөвшилцлийн үр дүнд Монгол Улсын Үндсэн хууль өөрчлөгдөх ёстой.
Н.Энх