УИХ-ын гишүүн Ж.Батзанданг АН-аас хөөж, Л.Болд, Д.Мурат нарыг сонгуульд нэр дэвшүүлэх эрхээс нь хассан. Үүнтэй холбогдуулан гишүүн Ж.Батзандан, Л.Болд нар мэдээлэл хийлээ.
УИХ-ын гишүүн Ж.Батзандан:
-Намайг АН-аас хөөх шийдвэр гаргажээ. Би намаасаа хөөгдсөн ч Монголоосоо хөөгдөөгүйдээ баярлаж байна. Тун удахгүй УИХ-ын дарга М.Энхболдыг огцруулна. 40 гишүүний бойкот үргэлжилнэ. Тун удахгүй манан-гийн халаасанд орсон С.Эрдэнэ, Д.Эрдэнэбатыг АН-аас зайлуулна. АН шинэчлэгдээгүй байна. АН-ыг шинэчилсэн гэж С.Эрдэнэ хуурмаг баг зүүсэн байна. АН-ын шинэчлэлд би оролцож, АН-ын эв нэгдлийн төлөө зүтгэсэн. Би ардчиллын төлөө зүтгэж байсан. Намын хууль бус шийдвэрт захирагдах эрх бидэнд байхгүй. Би дээрээ 10 ахтай хүн. Би ах нарынхаа төлөө биш ард түмний төлөө шийдвэр гаргасан. Надад нүүрсний тээвэр хийдэг эхнэртэй гэлээ. Миний эхнэр эмч мэргэжилтэй хүн. Нүүрсний тээвэрчин эхнэрээ хайж байна. Бид МАН-гийн талд зогсохгүй. Би АН-ынхаа мянга мянган гишүүдтэй хамт байх болно.
УИХ-ын гишүүн Л.Болд:
-Өнгөрсөн баасан гаригт хувьсгал болсон. Засгийн газрыг огцруулах асуудал МАНАН-гийн тогтолцооны дотоод хагарал, бүлэглэлийн дотоод тэмцэл. Үүнд АН ямар ч хамаагүй. Би өнөөдрийн шийдвэрийг хараад гутарч байна. АН ардчилсан биш коммунист нам болжээ. МАН-ын халаасны нам болжээ. УИХ-ын гишүүний хувьд ард түмнийхээ төлөө саналаа өгсөн. АН бүлэгтэйгээ үлдэхийн тулд Ж.Батзанданг хөөж, намайг үлдээж доромжиллоо. Би АН-ын бүлгээс гарна хэмээн мэдэгдэв.
Н.Энх