УИХ-ын 27 гишүүний Ерөнхий сайд У.Хүрэлсүхийг огцруулах санал чуулганы нэгдсэн хуралдаан дээр "унаж", Засгийн газар тогтож үлдлээ. Огцруулах сануулга авсан У.Хүрэлсүх Засгийн газраа "цэвэрлэж" эхэллээ. Тэрбээр өөрийнх нь эсрэг кноп дарсан БСШУС-ын сайд Ц.Цогзолмааг кабинетын зарчмаар ажиллаж чадаагүй, Ерөнхий сайдын бодлогыг баримтлаагүй шалтгаанаар огцруулахаар шийдвэрлэв.

Мөн ЖДҮХС-гаас зээл авсан ЗТХ-ийн сайд Я.Содбаатарыг үүрэгт ажлаас нь чөлөөлөхөөр болов. Сайдын албан тушаалаас чөлөөлөгдөж буй Я.Содбаатар ийм тайлбар өгч байна. 

-Та ажлаас чөлөөлөгдөх хүсэлтээ өнөөдөр өгсөн үү?

-ЖДҮХС-гийн зээлтэй нэр холбогдсонтой холбогдуулан ёсзүйн хариуцлага хүлээж, ЗТХ-ийн сайдын үүрэгт ажлаас чөлөөлөгдөх хүсэлтээ Ерөнхий сайдад өнөөдөр өгсөн. Миний хамаарал бүхий аж ахуйн нэгж Монгол Улсын хуулийн дагуу ЖДҮХС-аас зээл авсан. Энэ зээлээ хуулийн дагуу авч, төсөл амжилттай хэрэгжиж байгаа. Зээлээ буцааж бүрэн төлсөн. Монголын төртэй тооцоо нийлсэн гэж хэлж болно. Монгол Улсын хууль зөрчөөгүй ч улстөрчийн хувьд өнөөгийн улс төрийн нөхцөл байдлыг үнэлж, Ерөнхий сайд, МАН-ын дарга У.Хүрэлсүхийн хийж байгаа шударга ёсны тэмцэлд дэмжлэг болох үүднээс ийм алхам хийж байна. Цаашдаа УИХ-ын гишүүний хувьд сонгогчдынхоо итгэлийг хүлээж, Монгол Улсад шударга, зөв нийгэм байгуулахын төлөө хамтран тэмцэнэ.

-Та ББСБ-ын хэдэн хувийг эзэмшдэг вэ?

-Миний ХОМ дээр тодорхой байгаа. ББСБ-ын 25 хувийг эзэмшдэг. ББСБ-ын хөрөнгийн доод хэмжээ нэг тэрбум төгрөг байх ёстой. Энэ аж ахуйн нэгжийн хөрөнгө нэг тэрбумаас хэтрээгүй байгаа. Хэрвээ тэр рүү зээлийн мөнгө орсон бол нэмэгдсэн байх ёстой. Манай гэр бүлийн хүн ББСБ-ын 25 хувийг эзэмшдэг ч өдөр тутмын үйл ажиллагаанд нь оролцдоггүй гэдгийг хариуцлагатай хэлье. 

-Та ЖДҮХС-гийн зээл сөхөгдсөн үед өргөдлөө өгч болоогүй юу. Засгийн газар огцруулах асуудал яригдсаны дараа ёсзүйн хариуцлага хүлээж байгаа нь ямар учиртай вэ?

-ЖДҮХС-гийн зээлтэй холбогдсон сайд нараас болж Засгийн газрыг огцруулах асуудал яригдаагүй. Энэ бол шалтиг нь. Шалтгаан нь шударга бусын төлөө, МАНАН бүлэглэлийн эсрэг тэмцэж байгаа Засгийн газрыг энүүгээр шалтиглаж унагах гэж оролдсон. Миний хувьд энэ асуудалд холбогдсоны дараа өргөдлөө өгөх саналаа тавьсан. Салбарт нь ямар нэг асуудал гараагүй байхад сайдыг чөлөөлөх үндэслэл байхгүй гэж Ерөнхий сайд үзсэн. 

Б.Учрал