Өргөдлийн байнгын хороо хуралдлаа. Хуралдаанаар “Тусгай хамгаалалттай газар нутгийн үндэсний хөтөлбөр”-ийн хэрэгжилтийн талаарх Байгаль орчин, аялал жуулчлалын сайдын мэдээллийг сонслоо. Хэлэлцэж байгаа асуудалтай холбогдуулан гишүүд асуулт тавьж, хариулт авав. УИХ-ын гишүүн, ЭМ-ийн сайд  Д.Сарангэрэл:

-Тусгай хамгаалалттай газрын асуудлаар хариуцсан хүмүүсээс мэдэээл сонсч, хуулийн хэрэгжилтийг хэлэлцэж байгаа нь чухал. Туул голын хамгаалалтын асуудал нийслэлчүүдийн санааг зовоож байгаа. Туул гол бохирдож, ус нь ширгэж байна. Улаанбаатар хотын 97.5 хувийг ундны усаар хангаж байгаа. Туул голыг тойрсон аж ахуй нэгжийн үйл ажиллагааг зогсоох, хайрга авахыг хориглосон боловч хулгайн тээвэр үргэлжилсээр байгаа. Нийслэлийн мэргэжлийн хяналтын газрын дарга Л.Эрдэнэчулуунд энэ асуудлыг удаа дараа тавьсан. Гэвч энэ асуудалд Нийслэлийн мэргэжлийн хяналтын газар огт арга хэмжээ авахгүй байна. Яагаад Л.Эрдэнэчулуун дарга хууль бусаар хайрга олборлож байгаа аж ахуй нэгжийг хамгаалаад байна вэ. Нийслэлийн мэргэжлийн хяналтын дарга Л.Эрдэнэчулуунд хариуцлага тооцох ёстой гэлээ. 

Хэлэлцсэн асуудалтай холбогдуулан тодорхой саналыг холбогдох газруудад өгөхөө Өргөдлийн байнгын хорооны дарга М.Оюунчимэг мэдэгдлээ. Ийнхүү Өргөдлийн байнгын хорооны хуралдаан өндөрлөв. 

Н.Энх