УИХ-ын таван гишүүн чуулганы танхимын үүдэнд суулт зарласан тухай бид мэдээлсэн. Тэд УИХ-ын дарга М.Энхболдыг парламентыг удирдах ёсзүйгүй хэмээн үзэж огцрох шаардлагыг тавьж буй юм.
УИХ-ын гишүүн Т.Аюурсайхан: Бүтэн хоёр долоо хоногийн өмнө УИХ-ын даргыг албан үүргээ өгөх шаардлагыг тавьсан. Бидний хүсэлт шаардлага хуульд заасан үндэслэлтэй. УИХ-ын даргын огцрох шалтгаан бол иргэд, сонгогчдын эсэргүүцэл. Аль ч сум баг, дүүрэгт очсон үүнийг хэлээд өгнө. Бид иргэд сонгогчдынхоо үзэл бодлыг газар дээр нь хэрэгжүүлж байгаа хүмүүс. Тиймээс бид иргэд, олон нийтийн дуу хоолой болж, хуульд заасан үндэслэлээр хүсэлтээ гаргаач гэсэн сануулгыг өгч, шаардаж байна. Бид 14 хоногийн өмнө энэ шаардлагыг тавьсан. Үүнээс хойш байнгын хороо, чуулганы хуралдаан саатсан. Төрийн ажил гацаж байна. Төрийн ажилдаа хүндэтгэлтэй хандаач ээ.
УИХ-ын гишүүн Л.Болд: Бид сонгогчдынхоо төлөөлөл болох бололцоогүй болсон. Бидний тавьсан аливаа асуудлыг цааш нь тавьдаг. Зөвхөн өөрийнхөө хүссэн асуудлуудаа хэлэлцдэг, дэмждэг УИХ цаашаа явах бололцоо байхгүй. Гишүүдийн олонх нь эсэргүүцэж байхад тэсээд үлддэг дарга байхгүй. Аль ч улсад гишүүдийн 20, 30 хувь нь эсэргүүцэхэд дарга огцордог. Манай гишүүдийн олонх нь шаардаж байхад энэ шаардлагад яаж хандахыг харах л үлдлээ.
УИХ-ын гишүүн Ж.Батзандан: УИХ-ын чуулганы хуралдаанд тааллаараа оролцдог ганцхан субект нь Ерөнхийлөгч. УИХ-ын дарга чуулган, байнгын хорооны хуралдаан, нээлттэй сонсголын асуудлыг өөртөө таалагдвал зөвшөөрдөг, таалагдахгүй бол зогсоодог маягаар УИХ-ыг удирдаж болохгүй. Өөртөө нь хамааралтай 60 тэрбумын асуудал гарч ирэхээр зугтчихдаг. Сонсгол хийлгэдэггүй, байнгын хороог хуралдуулдаггүй. Ийм хууль бус үйлдлүүдийг М.Энхболд дарга удаа дараа гаргасан. Монголын ард түмнийг доромжилсон. Сонгогчдын дуу хоолойг боомилж байгаа УИХ-ын дарга М.Энхболдыг цаашид хүлээн зөвшөөрөх боломжгүй. М.Энхболдыг өөрийнхөө саналаар огцортол нь бид улс төрийн тэмцлээ үргэлжлүүлнэ.
УИХ-ын гишүүн Л.Оюун-Эрдэнэ: Дээр нь хөх тэнгэр байх ёстой Үндсэн хуулийн цэц хүртэл М.Энхболд гэдэг хүний өмнө хүчин мөхөсдөж байна. Би үүнийг удаа дараалан хэлж байгаа.
УИХ-ын дарга ёсзүй, хууль эрхзүйн хувьд ч, Үндсэн хууль, төрт ёсоо хүндэтгэх талаасаа ч их хурлыг цаашид удирдах эрхгүй болсон. Энэ хүн МАНАН бүлэглэлийн бөглөөс болж байна. Олон хэргүүдийг хааж боож байна. Тиймээс бид огцортол нь тэмцлээ үргэлжлүүлнэ.
Б.Учрал