УИХ-ын гишүүн Н.Номтойбаяр цаг үеийн асуудлаар мэдээлэл хийлээ. Тэрбээр:

-ЖДҮХС-тай холбогдсон УИХ-ын гишүүд, сайд нарыг Ерөнхий сайд У.Хүрэлсүх хамгаалаад байсны учрыг би нотлох баримт дээр үндэслээд та бүхэнд өгөх нь зүйтэй болов уу гэж би хэвлэлийн хурал хийхээр шийдлээ. МАН-ын дарга, У.Хүрэлсүх ЖДҮ-ийн загалмайлсан эцэг мөн гэдгийг сая тогтоолоо.2016 оны 12 сарын 13-нд У.Хүрэлсүх өөрийн төрсөн дүү У.Давхарбаярын нэрээр "Жаргалант махимпэкс" компанийн нэр дээр 1.326 тэрбум төгрөгийн зээл авах гэрээнд гарын үсэг зуржээ. Улмаар 2017 оны хоёрдугаар сарын 15-нд 327 сая 100 мянган төгрөгийг, мөн  2017 оны наймдугаар сарын 3-нд 236 сая төгрөгийг тус тус авсныг олж тогтоолоо. Мэдээж, үлдэгдэл 800 орчим сая төгрөгийг авсан нь тодорхой. Үүнийг нотлоход хэцүү ч шударга ёсыг эрхэмлэдэг нэгэн эмэгтэй надад үүнийг өгсөн. ЖДҮ-чин Ерөнхий сайдтай, МАН ЖДҮ-чин даргатай боллоо. Ерөнхий сайд У.Хүрэлсүх ХОМ-тээ 1.7 тэрбум төгрөгийн хадгаламж, хоёр орчим тэрбум төгрөгөөр үнэлэгдэх үл хөдлөх хөрөнгө, хэдэн зуун сая төгрөгөөр үнэлэгдэх автомашин, мотоцикльтой, Горхи, Тэрэлжийн тусгай хамгаалалттай газар байгаа өндөр зэрэглэлийн амралтын газар зэрэгтэй гэж мэдүүлдэг.  Амьдралдаа нэг ч бизнес эрхэлж байгаагүй хүн яаж авсан байх вэ. Тиймээс би Ерөнхий сайд У.Хүрэлсүхийг өөрөө өргөдлөө өгч огцрохыг шаардаж байна. Хэрвээ өөрөө өргөдлөө өгөхгүй бол би нөгөөдөр өөрийн баланк дээр гарын үсэг зуруулна. 

Ц.Нямдорж сайд ажлаа хиймээр байна. Эрх мэдэлтний өмнө хоёр нүүр гаргаж болохгүй. Байр сууриа илэрхийлсэн. Байр суурин дээрээ хатуу байх ёстой болов уу. Хууль хяналтынхан ажлаа хиймээр байна Надад энэ мэдээллийг хийхэд МАН эрх барьж байгаа энэ үед хүнд шийдвэр байлаа. Шинэ жил өргөн дэлгэр болж байгаа бололтой. Ард иргэдэдээ шинэ жилийн бэлэг болгоод огцрох өргөдлөө өөрөө өгөх байх. 48 цаг харъя. МАН-ын бага хурал маргааш 11.00 цагт болно хэмээлээ. Тэрбээр мэдээлэл хийснийхээ дараа сэтгүүлчдийн сонирхсон асуултад хариуллаа.

-Та энэ мэдээллийг хаанаас олж авсан бэ? Таныг бага хурлын гишүүнээс хөөнө гэж байсан. 

-Ер нь ийм мэдээлэл сонсоод их удсан. Баримтыг би өнгөрсөн долоо хоногт олж авсан. Ерөнхий сайд өнгөрсөн долоо хоногт Японд айлчилсан. Тиймээс Монгол Улсын нэр хүндийг бодсон. Бага хурлаас хөөх шийдвэр аль эрт 11 дүгээр сард гарсан байсан. Хөөвөл хөөнө л биз. 

-ЖДҮХС-гийн асуудал Ж.Эрдэнэбатын Засгийн газраас эхлэлтэй гэж яриад байсан?

-Аль ч Засгийн газрын үед ЖДҮХС-гийн зээл байсан. Магадгүй, ганц нэг эрх мэдэлтэн эндээс зээл авч байсан байх. Гэхдээ У.Хүрэлсүхийн Засгийн газрын үед дөрвөн гишүүнээс бусад нь нийтдээ 30 гишүүн ЖДҮХС-гаас зээл авсан байна. АН-аас нэг гишүүн авсан байсан. Засгийн газар, У.Хүрэлсүх ЖДҮ-чдийн эрх ашиг дээр тогтож байна. Ж.Эрдэнэбатын Засгийн газрын үед У.Хүрэлсүх Шадар сайд байсан. Тэр үед У.Хүрэлсүх манай дүүгийн нэр дээр ийм асуудал байна гээд өөрөө хөөцөлдөөд явж байсныг сүүлж олж мэдлээ. 

Н.Энх