Монгол Улсын Ерөнхийлөгч Х.Баттулгын санаачилсан Монгол Улсын Их Хурлын чуулганы хуралдааны дэгийн тухай хуульд нэмэлт оруулах хуулийн төслийг Монгол Улсын Ерөнхийлөгчийн Тамгын газрын дарга З.Энхболд өнөөдөр Улсын Их Хурлын дарга М.Энхболдод өргөн барилаа.
Хуулийн төслийн талаар Ерөнхийлөгчийн Тамгын газрын дарга З.Энхболдоос тодрууллаа.
-Ерөнхийлөгчийн санаачилсан хуулийн төслүүдийг УИХ хүлээж авахаас татгалзсан. Харин та сая хуулийн төслөө өргөн барилаа. Ямар шийдэлд хүрэв?
-Ерөнхийлөгч өчигдөр орой УИХ-ын чуулганы хуралдааны дэгийн тухай хууль болон УИХ-ын тухай хуульд нэмэлт оруулах хууль өргөн барихаар УИХ-ын даргатай ярилцаж, тохирсон. Харин УИХ-ын Тамгын газрын дарга Цолмонд бүртгэл дутуу шалтгаанаар аваагүй. Тиймээс би өнөө өглөө тайлбар бичсэн. Хууль тогтоомжийн хуулиар нэлээн хүнд суртал бий болгосон. Ямар ч хуулийн төслийг өргөн барихдаа 6-7 бичиг бүрдүүлдэг шаардлагатай. 20177 оны 5 дугаар сарын 12-ны өдөр УИХ-ын чуулганы дэгийн тухай хуулийн 12.22-д энэ аргачлалыг мөрдөхгүй хуулийн төслүүдийг баталсан. Олон улсын гэрээ, улсын төсөв, дайны тухай хууль, Засгийн газрын бүтэц бүрэлдэхүүн, хөгжлийн үзэл баримтлал зэрэг хууль тогтоомжид бүрдэл шаардахгүй гэж хуульчилсан. Энд Ерөнхийлөгчийн өргөн барьсан хууль багтсан. Энэ дагуу бид бүрдэлгүй гэдэгт дахиж заргалдаад, өнөө өглөө УИХ хүлээж авахаар болоод хуулийн төслөө өргөн барилаа.
-Хуулиудад оруулах өөрчлөлтийг тодорхой хэлж өгөөч?
-УИХ-ын дарга “Хууль байдаг бол би өргөдлөө өгмөөр байна. Хуууль байхгүй” гэж хэд хэдэн удаа ярьсан. Тэгэхээр Ерөнхийлөгч хууль санаачлаад, гарцыг нь гаргаж өгөхөөр боллоо. Үүнээс хойш УИХ-ын гишүүд даргыгаа томилж, чөлөөлдөг болно.
Энэ хуулиар УИХ-ын гишүүдийн олонх УИХ-ын даргыг үүрэгт ажлаас нь чөлөөлөх тухай саналыг УИХ-д албан ёсоор тавьж, тогтоолын төсөл өргөн мэдүүлсэн бол төслийг хэлэлцэнэ гэж заасан.
-Тухайн хуулиудын өөрчлөлт Үндсэн хуультай нийцэх үү?
-Үндсэн хуультай нийцүүлэхийн тулд санал авахаар Засгийн газарт хүргүүлсэн. Чөлөөлөх, огцруулах гэж байсныг огцруулах гэдэг үгийг УИХ-д өргөн барихдаа авсан. Учир нь УИХ-ын даргыг огцруулах асуудлыг зөвхөн Үндсэн хуулийн цэцийн шийдвэрийн дагуу шийдвэрлэнэ гэсэн хоригтой учраас чөлөөлөх асуудал нь үлдсэн.
-Хуулийн төслийг хэзээнээс хэлэлцэх бол?
-Ерөнхийлөгчийн саналаар бол нэн даруй хэлэлцэн баталж, УИХ-ын гацааг гаргах ёстой. Өнөөдрөөс эхлээд байнгын хороогоор хэлэлцээд эхэлж, ирэх долоо хоногийн дунд дуусна. УИХ-ын дарга хуулийн төслийг хэлэлцэх талаар бүлгийн дарга нарыг дуудаж уулзах байр суурьтай байна.
Б.Учрал
| Уншиж байна |