Д.Дамба-Очир, Б.Ундармаа, Л.Энхболд, Г.Солтан нарын УИХ-ын  дөрвөн гишүүний бүрэн эрхийг түдгэлзүүлэх хүсэлтийг Ерөнхий прокуророос өргөн бариад байгаа билээ.  Өнөөдөр Халдашгүй байдлын дэд хороо хуралдаж, дээрх нэр бүхий дөрвөн гишүүний бүрэн эрхийг түдгэлзүүлэх эсэхийг хэлэлцэнэ. Үүнтэй холбогдуулан УИХ-ын гишүүн Д.Дамба-Очироос зарим зүйлийг тодрууллаа.

-Таныг ямар хэрэгт холбогдуулан шалгаж байгаа вэ?

-УИХ-ын гишүүд орон нутаг,тойргоос нь хүсэлт ирдэг. Үүнийг цааш уламжлах нь УИХ-ын гишүүний үүрэг. Миний ойлгосноор УИХ-ын 30 гаруй албан бичиг хийж өгчээ гэж би ойлгож байгаа. Миний хувьд бичиг хийж, өгч тухайн компанийг дэмжсэн. Түүнээс надтай холбоотой зүйл байхгүй. Бүгдийг нь АТГ-аас дуудаж, асуулт асуусан. Яагаад адилхан бүгдээрээ бичиг өгсөн байтал намайг оруулж ирж байгааг ойлгохгүй байна.

Би УИХ-ын даргыг огцруулахыг шаардсан 40 гишүүний нэг. МАНАН-гийн, шударга ёсны эсрэг би зогсож байгаа. Шударга ёсыг бүрдүүлэхийн төлөө зогсож байна. Энэ үйл ажиллагааг би дэмжиж,гарын үсэг зурж, төрийн ажлыг сайжруулах, цэгцлэх, У.Хүрэлсүхийн өөрчлөлт хийх гэж байгааг дэмжсэн. Миний ах дүү, хамаатан садан, надтай холбоотой нэг ч хүн ЖДҮХС-гаас зээл аваагүй. Энэ бол улс төрийн шалтаг, шалтгаанаар оруулж ирж байна гэж харж байна. “Үнэнээр явбал үхэр тэргээр туулай гүйцэнэ” гэдэг. Цаг хугацаа бүгдийг харуулна

Надад ч бас эвгүй,амаргүй байна. Өнөөдөр манай компани дээр очоод гэрээ, дансыг шалгаад байна гэж байна. Бид иргэдээ, тойргоо төлөөлж байгаа, улс төрийн шийдвэр гаргадаг хүмүүс.

-Яагаад эхний ээлжинд дөрвөн гишүүн оруулж ирсэн бэ?

-Цаашдаа олон гишүүнийг оруулж ирэх юм шиг билээ. Үндэслэлтэй гэдгээ прокурор тайлбарлах байх.

-Гишүүд дэмжсэн гэдэг бичиг гаргаад хувь авдаг гэж прокурор ярьж байсан. Энэ талаар?

-Надад хувь авсан зүйл байхгүй. УИХ-ын дарга, Ерөнхий сайдын хоорондын асуудлаас болж гишүүдээр нь өргөн барьж байна гэж бодож байна.Шударга ёс тогтоосой билээ гэж бид бодож, энэ бүхнийг хийсэн. 

-Та хэдэн компанид бичиг гаргаж өгсөн бэ?

-Би нэг компанид бичиг гаргаж өгсөн. Тэр компани манайтай ямар ч холбоо байхгүй. Маш олон гишүүд өөрийн компаниараа, хүүхдүүдээрээ, ах дүүсээрээ энэ зээлийг авсан байдаг юм билээ.  

Н.Энх