УИХ дахь АН-ын бүлгээс УИХ-ыг тараах, УИХ-ын ээлжит бус сонгуулийг явуулах тогтоолын төсөл боловсруулжээ. Тус намын бүлэг тогтоолын төсөлдөө өнөөдрөөс гишүүдийн гарын үсэг цуглуулж байна. УИХ-ыг гишүүдийн 3/2-ын гарын үсгээ зурсан тохиолдолд дээрх төслийг өргөн барьж, хэлэлцүүлэх юм. УИХ дахь АН-ын бүлгийн дарга Д.Эрдэнэбат:

-Өнөөдрөөс АН-ын бүлэг УИХ-ыг тараах гарын үсэг цуглуулж эхэллээ. Бид УИХ-ын чуулганы танхимын үүдэнд самбар байрлуулж байна. Энэ самбарт УИХ-ыг тараах төслөө байршуулж байна. Гишүүд гарын үсгээ зурах нь тэдний эрх. Хамгийн гол нь УИХ-ын ээлжит бус сонгуулийг зохион байгуулна гэвэл нийт зардал 16 тэрбум төгрөг байгаа. Өнөөдрөөс УИХ-ын гишүүдийн гарын үсгийг цуглуулна. Гишүүд талцалгүйгээр өөрсдийн хүсэл сонирхлоор гарын үсгээ зурах хэрэгтэй.

Эхлээд гарын үсэг зурсан гишүүд тогтоолын төсөлд гарын үсэг зурна. Хэн нэгнийг дарамтлах, давуу эрх олгох зүйл байхгүй.

Монгол Улсын Үндсэн хуулиар төрийн эрх дээд  байгууллаг бол УИХ мөн. УИХ-ын үйл ажиллагаа гацсан тохиолдол өөрөө тарах хэрэгтэй хэмээв. Тэрбээр мэдээлэл хийснийхээ дараа сэтгүүлчдийн сонирхсон асуултад хариулав.

-Хэрвээ гишүүдийн гарын үсэг хуульд заасан хэмжээнд бүрдэхгүй бол яах вэ?

-Бүрдэхгүй бол бид дараагийн арга хэмжээгээ авна. Энэ самбар ажлын цагаар байнга ажиллана.

-УИХ-ын гишүүн Ж.Мөнхбат УИХ-ыг тараах гарын үсэг цуглуулж байгаа. Гарын үсэг давхардаж  болох уу?

-Ж.Мөнхбат гишүүний бланкид гарын үсэг зурсан гишүүд үнэхээр итгэл үнэмшил байгаа бол энэ тогтоолын төсөлд  гарын үсэг зурах ёстой.

УИХ-ыг тараах тогтоолын төсөлд одоогийн байдлаар УИХ дахь АН-ын бүлгийн  Д.Эрдэнэбат, З.Нарантуяа, Б.Мурат С.Эрдэнэ, Я.Санжмятав, Б.Пүрэвдорж  нарын нэр бүхий гишүүд гарын үсэг зуржээ.

Н.Энх