Жагсаал зохион байгуулагч Л.Болд нарын гишүүд “УИХ-ын гишүүн Ж.Мөнхбат, Н.Номтойбаяр нар жагсаалыг үймүүлж, иргэдийг сөргөлдүүлэх гэж байна” хэмээн сэтгүүлчдэд мэдээлэл хийхдээ дурдсан. Энэ талаар УИХ-ын гишүүн Н.Номтойбаяраас энэ талаар тодрууллаа.
-Ж.Мөнхбат гишүүн та хоёрыг жагсаал зохион байгуулагчдыг үймүүлэх гэж байна гэлээ. Энэ талаар?
-Би дөнгөж сая гадаадаас ирлээ. Үүнийг ГХ-ны сайд Д.Цогтбаатар гэрчилнэ. Тиймээс энэ жагсаал цуглаанд оролцоогүй.
-Танай бүлэг дөрвөн гишүүний бүрэн эрхийг түдгэлзүүлэх шаардлагагүй гэж үзжээ. Та санал нэгдэж байна уу?
-Сая прокуророос манай ЖДҮ-чдийн бүлэг 94.3 хувийн саналаар УИХ-ын дөрвөн гишүүнийг түдгэлзүүлэх шаардлагагүй гэж үзлээ. Ц.Нямдорж сайдын хэлж байгаа тайлбар хангалтгүй. Тэднийг шалгахад УИХ-ын гишүүний бүрэн эрх саад болоод байгаа шүү дээ. Хэрэг бүртгэлт, мөрдөн байцаалтын үйл ажиллагаа явуулахад УИХ-ын гишүүний бүрэн эрх нь саад болно. Энэ УИХ тарах хэрэгтэй. Би УИХ-ыг тараах бичигт гарын үсэг зурчихсан.
Мөн тэрбээр "Би та бүхэнд нэг баримт дэлгэе. Хугацаа шаардсан ажил байсан. Шинэ нисэх онгоцны буудал барих төсөл сүүлийн 10-аад жил хэрэгжиж байгаа. Японы улсын хөнгөлөлттэй зээлээр хэрэгжиж байгаа энэ төслийн хүрээнд 5.3 сая иен буюу 125 тэрбум төгрөгийн нефть бүтээгдэхүүн хадгалах байгууламжийг барьж ашиглалтад оруулахад бэлэн болсон. Японы талаас энэ байгууламжийг ашиглах, менежмент хийх сонирхолгүй байгаагаа албан ёсоор илэрхийлсэн. Гэтэл үүнийг Концессийн хуулийн дагуу сонгон шалгаруулалт зарлаж, гэрээлэх байтал 2017 оны долдугаар сарын 9-ний хуралдаанаар “Сод Монгол” компанийг шалгаруулж, гэрээлсэн Үүнийг ҮХГ-аас уралдаант шалгаруулалт явуулж хуулийн дагуу сонгон шалгаруулж гэж, мөн тендэр зарлаагүй, уралдаант шалгаруулалтаар явуулах ёстой гэж ЗГХЭГ-аас бичиг оруулсан ч У.Хүрэлсүх шууд шийдвэр гаргасан байна.
Үүний дараа нь У.Хүрэлсүхийн хамаарал бүхий этгээдэд "Сод Монгол”-ын Ц.Анандбазараас 500 сая төгрөг бэлнээр авч байгаад гардуулсан гэсэн мэдээлэл гарсан. Энэ нь Засгийн газрын шийдвэр гарснаас хойш 14 хоногийн дараа гарсан гэсэн. Би энэ асуудлыг хууль хяналтын байгууллагад өгнө.
-Та Засгийн газрыг огцруулах саналыг өргөн барих уу?
-Ерөнхий сайдыг огцруулах саналыг өргөн барьж болно. Гэхдээ чанарын ялгаа гарахгүй,бодит үр дүн чухал байна. Өнөөдөр дөрвөн гишүүнээ У.Хүрэлсүх улайран хамгаалж байна. Энэ дөрвийг явуулбал ар араасаа гоожоод дуусна гэж У.Хүрэлсүх хэлсэн. Хэрвээ дөрвөн гишүүний бүрэн эрхийг түдгэлзүүлсэн бол асуудал өөр байх байсан.
Н.Энх
| Уншиж байна |