Өнөөдрийн УИХ-ын чуулганы хуралдаан Ерөнхий прокурорын УИХ-ын гишүүдийн бүрэн эрхийг түдгэлзүүлэх саналыг хэлэлцэн шийдвэрлэж, Б.Ундармаа, Д.Дамба-Очир, Л.Энхболд, Г.Солтан нарын бүрэн эрхийг түдгэлзүүлэх шаардлагагүй хэмээн авч үлдэн, ХХААХҮ-ийн сайдаар Ч.Улааныг томилсоноор өндөрлөсөн юм.
17:05 цаг:
УИХ-ын чуулганы нэгдсэн хуралдаанаар УИХ-ын гишүүний бүрэн эрхийг түдгэлзүүлэх асуудлыг хэлэлцэж байна. УИХ-ын гишүүн Л.Энхболдын бүрэн эрхийг түдгэлзүүлэх асуудлыг хэлэлцэж байгаатай холбогдуулан гишүүд асуулт тавьж, хариулт авч байна. Гишүүд “100 тэрбум, С.Зориг агсны хэргийн явц ямар байгаа вэ” гэдгийг асуухад ХЗДХ-ийн сайд, Халдашгүй байдлын дэд хорооны дарга Ц.Нямдорж:
-С.Зориг агсны амь насыг хөнөөсөнтэй холбоотой хамгийн ноцтой өргөдөл өчигдөр надад ирсэн. Би цагдаагийн байгууллагад шилжүүлсэн. Хэрэг мөрдөх, мөрдөн байцаалтад би оролцох ёсгүй. Өргөдөл явуулсан, шилжүүлсэн бүх бичиг надад байгаа. Нууцаар халхавчилж өмгөөлөгчийн эрхэнд ноцтой халдсан гэсэн бол Улсын ерөнхий прокурор, хууль цаазын тэргүүн түшмэл М.Энх-Амгалан:
Гурван шатны шүүхээр шийдэгдсэн зүйлийг ХЗДХ-ийн сайд нь дахин дахин яриад байх боломжгүй. Хэрхэвч таарахгүй байх. Ирж байгаа өргөдлүүдийг хүлээж авч, гурван янзын эрүүгийн хэрэг үүсгээд явж байгаа. Шалгаж тогтоосон хэргийг хэрэг биш болгох гээд явж байгаа зүйл ч байгаа. Аль алиных нь хариу өнөөдөртөө гараагүй байна.
Гишүүд яагаад заавал бүрэн эрхийг нь түдгэлзүүлэх гээд байгаа юм гэж байна. УИХ-ын гишүүний бүрэн эрхээр дархлагдсан хүнийг бүрэн дүүрэн шалгах боломжгүй. Энэ хүмүүс хуулиар "ингэж болохгүй, тэгж халдаж болохгүй" гээд олон бүрэн эрх байдаг.
Б.Ундармаагийн бүрэн эрхийг хэвээр үлдээв
16:30 цаг:
УИХ-ын чуулганы нэгдсэн хуралдаанаар УИХ-ын нэр бүхий гишүүдийн бүрэн эрхийг чөлөөлөх асуудлыг хэлэлцэж байна. Эхлээд УИХ-ын гишүүн Б.Ундармаа гишүүний бүрэн эрхийг түдгэлзүүлэх асуудлыг хэлэлцэж, гишүүд асуулт тавьж, үг хэлж дууслаа.
Одоо хуулийн дагуу нууц санал хураалт явуулах гэж байна. Тиймээс УИХ-ын дарга нууц санал хураалтыг цаасаар авах уу, цахимаар явуулах уу" гэдэг санал гаргалаа. Гишүүдийн 94.7 хувь нь цахимаар нууц санал хураалт явуулахыг дэмжив.
Ингээд байнгын хорооны саналаар УИХ-ын гишүүн Б.Ундармаагийн бүрэн эрхийг түдгэлзүүлэх шаардлагагүй гэснийг дэмжье гэдэг санал хураалт явууллаа.
Нууц санал хураалтаар УИХ-ын гишүүн Б.Ундармаагийн бүрэн эрхийг түдгэлзүүлэх шаардлагагүй гэж хуралдаанд оролцсон гишүүдийн 82.7 хувийн саналаар дэмжлээ.
Дараагаар нь УИХ-ын гишүүн Л.Энхболдын бүрэн эрхийг түдгэлзүүлэх асуудлыг хэлэлцэж эхлэв.
Д.Лүндээжанцан: Хувь гишүүний бүрэн эрхийг түдгэлзүүлэх асуудал УИХ-ын дархлаатай холбоотой
15:50 цаг:
УИХ-ын чуулганы нэгдсэн хуралдаанаар УИХ-ын гишүүдийн бүрэн эрхийг түдгэлзүүлэх асуудлыг хэлэлцэж байна. Ерөнхий прокуророос УИХ-ын гишүүн Б.Ундармаа, Г.Солтан, Д.Дамба-Очир, Л.Энхболд нарыг ЖДҮХС-гаас өөрийн хамаарал бүхий компанидаа эрх мэдлээ ашиглан зээл авсан гэх үндэслэлээр яллагдагчаар татахаар бүрэн эрхийг нь түдгэлзүүлэх саналыг оруулаад байгаа юм. Хэлэлцэж байгаа асуудалтай холбогдуулан гишүүд асуулт тавьж, хариулт авлаа.
УИХ-ын гишүүн Ж.Мөнхбат:
-ЖДҮХС-д манай Архангай аймгаас 45 хүн нийтдээ 850 сая төгрөгийн зээл авах хүсэлтийг ХХААХҮЯ-нд санал тавихад шийдэгдээгүй байгаа юм. Халдашгүй байдлын дэд хорооны хуралдаанаар нэр бүхий гишүүдийн бүрэн эрхийг түдгэлзүүлэх шаардлагагүй гэж үзжээ. Би тойргийн сонгогчдодоо яаж тайлбарлах вэ? Энэ бол байж болохгүй асуудал. Би Ц.Нямдорж, Ч.Улаан, Н.Энхболд, Ө.Энхтүвшин гишүүн, тэгээд Д.Лүндээжанцан ахаасаа “2020 онд бид сонгогчдодоо, ЖДҮ эрхлэгчдэдээ очоод юу гэж хэлэх вэ?. Өнөөдөр энэ гишүүдийн аваад үлдчихлээ” гэдгийг асууя.
Ерөнхий прокурор М.Энх-Амгалан:
-Би үүнийг хэрэг мөн гэж үзээд оруулж ирж байгаа. Яагаад гэвэл ард нийтийн тэгш байдалд албан тушаалаа урвуулан ашиглаж, авсан. 1034 төсөл ирүүлснээс 234 иргэн, аж ахуй нэгжид зээл өгсөн. Гэтэл оруулж ирж байгаа гишүүдийн материал эхний 1000 гаруй төсөлтэй хасагдахаар байсан. Авсан зээлээ зориулалтаар нь зарцуулаагүй. Өөрийнх нь хамааралтай, эсвэл өөрөө хэрэглэсэн байна гэж оруулж ирээд байгаа юм. Яллагдагчаар татаж, эрүүгийн хэрэг үүсгэх боломжтой гэсэн шийдвэр гаргасан.
Халдашгүй байдлын дэд хорооны гишүүн Д.Лүндээжанцан:
-Халдашгүй байдлын дэд хороо хоёр өдөр хуралдсан. Халдашгүй байдлын дэд хорооны дарга Ц.Нямдорж чуулган дээр тайлбар хийсэн. Хувь гишүүний бүрэн эрхийг түдгэлзүүлэх асуудал УИХ-ын дархлаатай холбоотой яригдаж байна гэж үзсэн. Халдашгүй байдлын дэд хороо “хэрэг мөн байна”, “хэрэг биш байна” гэсэн дүгнэлт гаргаагүй. Шалгалтын ажиллагаа дуусаагүй байна. Бүрэн эрхийг нь түдгэлзүүлэхгүй үлдээснээр халдашгүй дархан байдал нь хэвээр үлдэж байгаа асуудал биш. Энэ удаад түдгэлзүүлэх боломжгүй байна гэж үзсэн.
УИХ-ын гишүүн Б.Энх-Амгалан:
-Энэ зээлийг олгохдоо гэрээ байгуулж хийдэг үү, зээлийн гэрээнд гишүүд гарын үсэг зурсан уу гэдгийг Б.Батзориг гишүүнээс асуумаар байна.
УИХ-ын гишүүн Б.Батзориг:
-Төрийн ажил улстөржиж байгаад харамсаж байна. Зээл олгох тусгай журам байдаг. ЖДҮ-чдээ дэмжиж байж улс орон хөгжинө. Зээл журмын дагуу олгогдсон гэдэгт итгэлтэй байна. Төслийн сонгон шалгаруулалтын хороо хуралдаж, шийдвэр гаргадаг. Хүртээмж бага байгаа учир олон нийт улстөржөөд байгаа юм.
УИХ-ын гишүүн Б.Ундармаа:
-Би М.Энх-Амгалан прокурорыг дарамталсан зүйл байхгүй. Мөрдөн байцаагчийн асууж байгаа асуултад хоёр цаг гаруй хариулсан. Шалгарсан аж ахуйн нэгжээс нь лавласан. Сонгон шалгаруулалтад тэнцээд гэрээгээ хийж явсан гэдэг зүйлийг хэлсэн.
Чуулганы хуралдаан үргэлжилж байна.
УИХ-ын гишүүдийн бүрэн эрхийг түдгэлзүүлэх асуудлыг үргэлжлүүлэн хэлэлцэж эхэллээ
15:10 цаг:
УИХ-ын чуулганы хуралдаан гишүүдийн 58.7 хувийн ирцтэй эхэллээ. Чуулганы хуралдаанаар эхлээд УИХ-ын гишүүдийн бүрэн эрхийг түдгэлзүүлэх тухай асуудлыг үргэлжлүүлэн хэлэлцэхээр төлөвлөжээ. Мөн Ашигт малтмалын тухай хуульд өөрчлөлт оруулах тухай хуулийн төсөл, ЗТХ-ийн сайд Я.Содбаатарыг чөлөөлөх тухай зэрэг 20 орчим хуулийн төслийг хэлэлцэхээр төлөвлөсөн байна.
Хэлэлцэх асуудлын дарааллыг УИХ-ын дарга М.Энхболд танилцуулав. Ингээд хэлэлцэж байгаа асуудалтай холбогдуулан гишүүд асуулт тавьж, хариулт авч байгаа юм.
Н.Энх
| Уншиж байна |