УИХ-ын чуулганы нэгдсэн хуралдаанаар Төрийн албаны тухай хууль хэрэгжиж эхэлсэнтэй холбогдуулан ангилал, цол зэргийг тогтоох асуудлыг хэлэлцлээ. Хэлэлцэж байгаа асуудалтай холбогдуулан гишүүд асуулт тавьж хариулт авав. УИХ-ын гишүүн Б.Элдэв-Очир:
-Төрийн албанд 200 гаруй мянган албан хаагч ажиллаж байгаа. АН 40 мянган хүнийг төрийн албанд авсан гэдэг. Дараа нь манай нам 2016 оны УИХ-ын сонгуулиар ялаад 30 мянган хүнийг танил тал, найз нөхөд, ах дүүгээ үндэслэлгүйгээр орон тоо гарган төрийн албанд авлаа гэдэг. Одоо энэ хууль хэрэгжсэнээр танил талаар төрийн албанд орох үзэгдэл харьцангуй гайгүй болох байх гэж бодож байна. Төрийн албанд ажиллагсдын цалин хангамж нэмэгдээд эхэлвэл үүнийг дагаад хувийн хэвшлүүд цалингаа нэмнэ.
УИХ-ын гишүүн Д.Тогтохсүрэн:
-191 мянган төрийн албан хаагч байна. 135 мянга орчим нь боловсрол, эрүүл мэнд, шинжлэх ухаан, соёл урлагийн салбарын төрийн үйлчилгээний албан хаагч байна. 35 мянга нь төрийн тусгай, 18 орчим мянга нь төрийн захиргааны албан хаагчид байна. Шатлан дэвших тогтолцоотой төрийн албан хаагчийн тухай хуулийг хэлэлцэж байна. Түүнээс бус сонгуулийн дараагаар дураараа хүн төрийн албанд орох нь шинэ хуулиар хязгаарлагдсан. Төрийн өндөр албан тушаалтантай холбоотой асуудлыг авч үзэхдээ өмнөх жишгий эвдээгүй.
УИХ-ын гишүүн С.Бямбацогт:
-Төрийн албан хаагчийн зэрэг зиндааг тогтоохгүй бол төрийн өндөр албан тушаалтнууд нь төрөө хүндэтгэхгүй байна. Тиймээс бид зайлшгүй зэрэг зиндааг тогтоож байна. УИХ-ын гишүүд сонгогдоод, албан тушаалын ангилал зэрэглэлээр дээшээ явж болохгүй. Тиймээс Шадар сайдыг УИХ-ын гишүүдтэй адилтгах зэрэглэлд авч ТӨ-III зэрэглэлд авч үзэж байгаа.
Ийнхүү уг тогтоолын төслийг хэлэлцээд эцсийн хэлэлцүүлэгт бэлтгүүлэхээр холбогдох байнгын хороонд шилжүүлэв.
Н.Энх