Америкийн тэрбумтан Жорж Сорос өчигдөр БНХАУ-ын Ерөнхийлөгч Си Зиньпинийг хурцаар шүүмжилсэн талаар "Ройтерс" агентлаг мэдээллээ.

Тэрбумтан эр өдгөө Швейцарийн Давос хотноо зохион байгуулагдаж буй Дэлхийн Эдийн Засгийн чуулга уулзалтад оролцож буй юм.

Тэрбээр оройн зоогийн үеэр "Үнэнийг хэлэхэд Си Зиньпин бол чөлөөт нийгмийн хамгийн аюултай дайсан" гэж хэлжээ.

Сорос үргэлжлүүлэн "Хятадын эрх баригчид хиймэл оюун ухаанаар иргэдээ чагнаж, тагнадаг. Тэд үргэлж ард түмнийхээ дуу хоолойг боодог. Хэрвээ нийгмийн онооны системийг нэвтрүүлбэл тэрбээр иргэдээ бүрэн хяналтадаа авна. Энэ улс зөвхөн авторитар дэглэмтэй улс. Өнөө үед энэ улс дэлхийн хамгийн нөлөө бүхий, хүчирхэг улс болоод буй. Энэ бүх давуу тал нь Си даргыг чөлөөт ертөнцийн хамгийн аюултай дайсан болголоо" хэмээв. 

Мөн тэрбумтан эр олон улсад хандан БНХАУ-ын "ZTE", "Huawei" зэрэг компаниудаас "5G" технологийг худалдаж авахгүй байхыг уриаллаа.

Учир нь эдгээр компаниуд Засгийн газартайгаа нягт холбоотой ажилладаг ба гадаадын орнуудад тагнуул хийж, удирдлагууддаа "давуу мэдээлэл дамжуулдаг" гэжээ. 

АНУ, БНХАУ-ын дунд үүсээд буй худалдааны дайн өдгөө хоёр жилийнхээ нүүрийг үзэж байна. Тэрбумтан эр мөн уг дайнд АНУ-ын Ерөнхийлөгч Дональд Трамп сул дорой байна гэж хурцаар шүүмжилжээ.

"Ерөнхийлөгч Трамп Хятадтай худалдааны дайн хийж буй мөртлөө гол холбоотнуудтайгаа зөрчилдөж, ашиггүй байдлыг бий болгож байна" гэж Сорос мэдэгдэв. 

Б.Дэлгэрцэцэг