Нийслэлийн Иргэдийн төлөөлөгчдийн хурлын тогтоолоор нийслэлийн Хөдөө аж ахуйн салбарын шилдгүүдийг өнөөдөр шалгаруулж шагналыг гардуулан өглөө. Шагналыг нийслэлийн Засаг дарга бөгөөд Улаанбаатар хотын Захирагчийн үүргийг түр орлон гүйцэтгэгч Ж.Батбаясгалан гардуулан өглөө.

“Нийслэлийн тэргүүний фермер”-ээрСонгинохайрхан дүүргийн 21 дүгээр хорооны фермер Л.Цэдэнсодном, Ш.Ганбаатар, Б.Даваахүү, 32 дугаар хорооны фермер С.Цэрэгбаатар

Хан-Уул дүүргийн 12 дугаар хорооны фермер С.Сонгууль, Н.Баттөр, 13 дугаар хорооны фермер Ч.Зулжаргал

Багануур дүүргийн 1 дүгээр хорооны фермер Д.Нармандах, 4 дүгээр хорооны фермер Ж.Загдсүрэн нар тодорлоо.

“Нийслэлийн тэргүүний тариаланч”-аар Сонгинохайрхан дүүргийн 32 дугаар хорооны тариаланч Ж.Базаррагчаа, Чингэлтэй дүүргийн 15 дугаар хорооны тариаланч Г.Батбаяр нар тодруулж шагнал гардууллаа.

Нийслэлийн тэргүүний фермер, тариаланчаар шалгарсан иргэдэд баяр хүргэж нийслэлийн Засаг дарга бөгөөд Улаанбаатар хотын Захирагчийн үүргийн түр орлон гүйцэтгэгч Ж.Батбаясгалан үг хэллээ. Тэрээр “нийслэлийн шилдэг фермер, тариаланчаар шалгарсан нийт иргэд та бүхэндээ НИТХ, НЗДТГ-ы нэрийн өмнөөс баяр хүргэе. Өөрсдийн мэргэжил, ажил хөдөлмөрөөс гадна нийслэлийн нийт хүн ардын эрүүл аюулгүй хүнсийг бэлтгэхэд та бүгдийн оруулж буй хувь нэмэр өндөр юм. Үүнийг нийслэлийн нутгийн захиргааны байгууллага, ялангуяа хүнс хөдөө аж ахуйн салбарын нийт хамт олон та бүгдийн хийж хэрэгжүүлсэн ажлыг өндрөөр үнэлж НИТХ-аас шийдвэр гаргасан. Та бүхний цаашдын ажил үйлсэд өндөр амжилт хүсэе” гэлээ гэж НЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.