Төрийн байгуулалтын байнгын хорооны хуралдаанаар Засгийн газрын хэрэг эрхлэх газрын даргад нэр дэвшигчийг дэмжлээ. Санал хураалтад 10 гишүүн оролцож, 100 хувийн саналаар нэр дэвшигч Л.Оюун-Эрдэнийг дэмжив.

Тус байнгын хорооны дарга Д.Лүндээжанцан "Засгийн газрын гол гал зуух, жанжин штаб болсон хэрэг эрхлэх газрын үүрэг роль их. Амжилттай ажилласан Засгийн газрын ар тал нь хэрэг эрхлэх газар байдаг. Үүнийг удирдаж ажиллуулахаар Л.Оюун-Эрдэнийг санал болгож байна. Дэмжиж байна. 

Засгийн газрын мөрийн хөтөлбөрийн хэрэгжилтийн хувь заяаг шуурхай удирдлагаар хангах, салбар хоорондын харилцааг хангаж ажиллах, хяналт шалгалтыг хэрэгжүүлэх, төрийн албан хаагчдын хариуцлага сахилга зэрэг бүхий л асуудлын зангилаан дээр байгаа учраас маш их ачаалалтай ажиллана. дээр нь хуулиа хэрэгжүүлж, биелүүлэх үүрэг ЗГХЭГ-т ногдоно" гэсэн захиасыг хэллээ.

Төрийн байгуулалтын байнгын хорооны санал дүгнэлтийг УИХ-ын чуулганы нэгдсэн хуралдаанаар хэлэлцэнэ.

М.Болд