Сүлжээ дэлгүүр шүүх биш
2019-02-15

 

Эрх ашгаа хамгаалуулах хүсэлтэй иргэдийн ШӨХТГ-т хаягладаг гомдлуудаас хамгийн их жин дардаг нь сүлжээ дэлгүүрүүдтэй холбоотой байдаг. Лангуу болон кассын үнийн зөрүүгээс гадна давамгай байдлаараа далимдуулаад 20-30 хувийн ашиг олдгийг О.Магнай ШӨХТГ-ын дарга байхдаа хэлж байв.

 

Тэрээр “Үйлдвэрлэгчид 3-5, импортлогчид 10 хувийн ашгийн төлөө ажиллаж байхад сүлжээ дэлгүүрүүд  давамгай байдлаа ашиглаж, 20-30 хувийн ашиг нэмж байна. Эцсийн үр дүнд иргэд хохирч байна” гэж байсан удаатай.Тухайн үед ШӨХТГ-аас нийслэлд үйл ажиллагаа явуулдаг “Номин”, “Миний сүлжээ”, “Макс”, “Замбалай”, “Оргил” зэрэг томоохон сүлжээ дэргүүрүүдэд шалгалт хийхэд лангуун дээрх үнэ кассын үнэтэй зөрсөн зөрчил илэрсэн гэдгийг мэдээлж байсан. Мөн сүүлд  “М-Си-Эс Кока Кола” компани ундаа, ус, жүүс зэрэг шингэн хүнсний бүтээгдэхүүнийхээ жижиглэнгийн үнийг “Номин” сүлжээ дэлгүүртэй үгсэн тохиролцож нийлүүлдэг талаарх гомдол ШӨХТГ-т ирснийг хэвлэлүүд хангалттай мэдээллээ. Тэгвэл энэ мэтээр иргэдийг хохироож, төөрөлдүүлдэг сүлжээ дэлгүүрүүд улам даварч, сүүлдээ хүний эрхийг  ноцтой зөрчиж байгаа талаарх гомдол ХЭҮК-т иржээ. Тодруулбал, иргэн А-г “Номин супер маркет” дэлгүүрээр үйлчлүүлээд гарахад найман настай хүүхэд нь 2000 төгрөгийн үнэтэй ууттай чихэр кассанд бичүүлэхгүйгээр авч гарсан байна. Гэтэл дэлгүүрийн хамгаалалтын ажилтан иргэний хувийн мэдээлэл, гар утасны дугаарыг авч, найман настай хүүг нь бичүүлэлгүй авч гарсан барааг бариулж зогсоож байгаад зургийг авч самбарт тавина хэмээн бага насны хүүхэдтэй гэмт хэрэгтэнтэй адил харьцаж, сэтгэлзүйн гүн цочролд оруулсан талаар гомдол гаргажээ.

 

Гомдлын дагуу шалгаж, тайлбар авахад “Номин холдинг” компанийн Борлуулалт үйлчилгээний салбар дэлгүүрүүдэд мөрддөг журамд хулгай хийсэн этгээд болон хулгайлсан барааг зургаар баталгаажуулж, самбарт байршуулах, байршуулсан зургаар нэгдсэн сан үүсгэх бүртгэлд оруулах талаар зохицуулсан байжээ.

 

Мөн дэлгүүрийн журамдаа оруулсан сэрэмжлүүлгийн самбарт “Хулгай хийсэн этгээдийн зургийг авах, овог нэр, огноо зөрчил гаргасан үйлдлийг самбарт бичиж байршуулах, цахим мэдээллийн сан болон бүртгэлд овог нэр, регистрийн дугаар, гэрийн хаягийг бичиж оруулах, хулгайлсан барааны үнийн дүнд дүйцүүлэн 1000-10 мянган төгрөгийн үнийн дүн бүхий барааг хулгайлсан бол 10 хоног, 240 мянган төгрөгөөс дээш үнийн дүн бүхий бараа хулгайлсан бол зургаан сар зургийг нь самбарт байршуулах, хугацаа дууссан зургийг тухайн салбар хариуцсан дарга бүртгэлээр архив үүсгэн хадгалах” хэмээн  тусгасан байжээ. Өөрөөр хэлбэл, эдний журмаар бол таны балчир хүүхэд болгоомжгүйгээсээ болоод эдний дэлгүүрээс 1000 төгрөгийн боодол бохь аваад гарвал зураг, нэртэйгээ хулгайчаараа цоллуулаад сэрэмжлүүлгийн самбарт арав хоног байршина гэсэн үг. Уг нь Монгол Улсын хууль журмаар хүний гэм буруутайг гагцхүү шүүх тогтоодог байтал “Номин” зэрэг сүлжээ дэлгүүрүүд шүүхийн өмнүүр орж, хууль журмаас давж хүний гэм буруутайг шүүдэг болжээ.

 

Дээрх үйлдэл хүний хувийн нууц, нэр төр халдашгүй дархан байх, гэм буруутайг нь хуулийн байгууллага тогтоох хүртэл гэм буруугүйд тооцогдох эрхийг зөрчсөн гэж үзэж ХЭҮК-оос шаардлага хүргүүлсэн байна.

 

Эх сурвалж: “Зууны мэдээ” сонин

С.УЯНГА

Shuud.mn
Сонин хачин
@:
зарж бгаа хүнс гоо сайхан гэр ахуйн бараанууд нь хэд нэмсэн үнэтэй бонус карт нь шал худлаа
2019-02-15
@:
номин супермаркет ч аймар юм бна лээ би байнга ордог юм тэгсэн чинь намайг миний авах юм бхгүй бсан болхоор зүгээр кассныхан хажуугаар гархад дуудаад куртик тайлуулж нэгжсэн 2 ч удаа гийн тохиолдол би юм авахгүй юм чинь гарчхаж болдгүйм бхдаа гэж бодоод гайхсан заавал орхоороо юм худалдаж авах ёстой үгүй бол хулгайд сэрдэгдэж нэгжүүлнэ камер ажилладаг байж арай камераар бүх юм бичигдэж л бгаа шдээ хүнийг ѳмссѳн хувцасаар нь харьцах гээд бна уу даа жоохон муухай хувцаст хүн бүр хулгайч болж харагдах гоё хувцаст бол хүн болж харагдана
2019-02-15
111111:
Манай сүлжээ дэлгүүрүүд Солонгосын сүлжээнүүдэд эхнээсээ байр сууриа алдаад эхэлчихсэн, Е-март, бусад жижиг CU зэрэг сүлжээнүүд орж ирдэг нь ч зөв, удахгүй 7-11, эсвэл wallmart зэрэг нь ороод ирвэл Номин, Оргил, Миний гмтүүд шуналтаад байдаг нь хөрсөн дээрээ бууна.
2019-02-15
Daak:
Хүүхэд л бол хүүхэд шүү дээ манай хүү хүртэл хааяа дэлгүүрт орохдоо өндгөн шоколад авчихсан намайг эвгүй байдалд оруулцан зогсож л байдагшдээ
2019-02-15
Juju:
Nomin humuusiig ilt shuldag gazar.orohoo l bolchihol doo humuusee.
2019-02-15
Зочин:
Зайлшгүй хөндөх сэдвийн нэг бол энэ. Номин арай дэндүү шүү дээ. Өнөөдөр Монголд хамгийн ашигтай орлоготой газрууд бол сүлжээ үүсгэсэн супермаркет нэртэй шулааны дэлгүүрүүд гэхэд хилсдэхгүй. Өөрсдөө ямарч үйлдвэрлэл эрхэлдэггүй, нийгэмд юу ч хийж бүтээдэггүй хирнээ бусдын бараа бүтээгдэхүүнд ширхэг тутамд 20-30%,цаашлаад 1-2 дахин өндөр үнэ нэмж зарж борлуудаг нь үнэн шүү дээ. Үүнд нь шалгаж хянадаг байгууллага гэж хаа ч алга. Монголд төр,засаг байхгүйн тод илрэл энд л харагддаг. Сүлжээ нэртэй энэ мэт дэлгүүрүүдэд дандаа хүний эрхийг зөрчиж байгаа явдал ихээр гардаг.
2019-02-15
ЗОЧИН:
ХҮҮХЭД ГЭДЭГ ТАЛААС НЬ ДҮГНЭЛТ ХИЙХ ХЭРЭГТЭЙ ШҮҮ ДЭЭ , НОМИНГИЙНХООН . ШААРДЛАГА ХАНГАСАН КАМЕР ТАВИАД ТҮҮНИЙГЭЭ ЗӨВ УНШИЖ БОЛОВСРУУЛАЖ ЧАДАХГҮЙ БОЛ ДЭЛГҮҮРЭЭ ХААХ ХЭРЭГТЭЙ , ТҮҮНЧЛЭН ӨӨРСИЙНХӨӨ БАРААГ Л ХАРААД СУУГААД БАЙДАГ ХҮНИЙ КАРМА , ЦҮНХНЭЭС ХУЛГАЙ ХИЙЖ БАЙГАА ХҮНИЙГ ТАНАЙ КАМЕР БИЧИЖ Л БАЙГАА ШҮҮ ДЭЭ , ТҮҮНИЙГ ИЛРҮҮЛЭЭД ҮҮДЭН ДЭЭРЭЭ БАРИАД ӨГЧ БАЙГАА ТОХИОЛДОЛ ХЭД БАЙГАА ВЭ?
2019-02-15
хулгай хийхээ л больчих л доо
2019-02-15