Хоёрдугаар сарын 8-11-ний өдрүүдэд Таван богд фүүд компанийн KFC Зайсан салбарт хоол идсэн хүмүүс хоолны хордлого авч, ХӨСҮТ-д 37 хүн хэвтэн эмчлүүлж буй талаар бид мэдээлсэн. Энэ талаар Нийслэлийн мэргэжлийн хяналтын газраас мэдээлэл хийлээ.
Мэргэжлийн хяналтын байцаагч нар тус газрын тоног төхөөрөмжөөс арчидас, хоол, ундны усны дээж, агаарын сорьцыг авч, төв лабораторид шинжлүүлэхээр өгсөн байна. Мөн тус салбарын ажилтан болох 28 хүнээс ХӨСҮТ шинжилгээ авчээ. Зөрчлийн хуулийн дагуу мэргэжлийн хяналтын байгууллагаас прокурорт хандаж, KFC Зайсан салбарын үйл ажиллагааг энэ сарын 13-наас эхлэн түр хугацаагаар зогсоосон байна. Лабораторийн шинжилгээний хариу энэ сарын 18-нд гарна гэсэн мэдээллийг өглөө.
KFC нь 12 салбартай аж. Одоогоор бусад салбарыг шалгаагүй гэнэ. Учир нь зөрчлийн хуулийн дагуу зөвхөн тухайн хэрэг асуудал гарсан газрыг шалгах ёстой. Мөн лабораторийн шинжилгээний хариу гараагүй учраас шалгахгүй байгаа гэдгээ мэргэжлийн хяналтын байгууллагаас мэдээлэв.
Нийслэлийн мэргэжлийн хяналтын газраас 2017, 2018 онд KFC Зайсан салбарыг шалгасан байна. Тус салбар 2017 онд бага эрсдэлтэй үнэлэгдэж байсан бол 2018 онд дунд эрсдэлтэй болон үнэлгээ буурчээ. Энэ нь ямар нэг зөрчил илэрч, арга хэмжээ авсан гэсэн үг аж.
М.Болд