Ерөнхий сайд У.Хүрэлсүх С.Мөнхчулууныг нийслэлийн Засаг даргаар томилон батламжлахаас татгалзсан албан бичгийг өчигдөр НИТХ-ын дарга С.Амарсайханд хүргүүлжээ. Уг албан бичигт “НИТХ-ын хурлын ээлжит бус VI хуралдаанаас Нийслэлийн Засаг даргаар томилуулахаар нэр дэвшүүлсэн С.Мөнхчулууныг Нийслэлийн Засаг даргаар томилохоос татгалзаж байгааг үүгээр мэдэгдэж байна” гэжээ.
Нийслэлийн Засаг дарга бөгөөд Улаанбаатар хотын захирагчид нэр дэвшигчийг сонгох санал хураалтад олонхийн санал авсан С.Мөнхчулууныг батламжлуулах тухай албан бичгийг нэгдүгээр сарын 16-ны өдөр Ерөнхий сайдад хүргүүлээд байсан билээ.
Хуулийн дагуу Ерөнхий сайд нэр дэвшигчийг Засаг даргаар томилохоос татгалзсан хариу мэдэгдвэл 15 хоногийн дотор НИТХ хуралдаж, Нийслэлийн Засаг даргыг санал хураалтаар тодруулна. Харин Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуульд зааснаар хоёр дахь нэр дэвшигчийг Ерөнхий сайд татгалзахгүй батлах заалттай юм.
Н.Энх
Уншиж байна |