НИТХ-аас хотын даргад С.Мөнхчулууны нэрийг дэвшүүлсэн. Тэрбээр заалнаас нэрээ дэвшүүлж, МАН-ын удирдах зөвлөлөөс нэрийг нь дэвшүүлсэн НИТХ-ын дарга С.Амарсайханыг тоосондоо үлдээсэн ч Ерөнхий сайд У.Хүрэлсүхийн босгыг давсангүй. Засгийн газрын тэргүүн өнгөрсөн баасан гаригт НИТХ-ын дарга С.Амарсайханд бичиг илгээж, С.Мөнхчулууныг хотын даргаар томилохоос татгалзаж байгаагаа дуулгажээ. Улаанбаатар хот даргагүй хоёр сарын хугацааг үдэж буй. Цаашид ямар хугацаа өнгөрөөхийг Ерөнхий сайд У.Хүрэлсүх мэднэ.
Ерөнхий сайд У.Хүрэлсүхийн С.Мөнхчулууны нэрийг буцаасан шалтгаан тодорхойгүй. НИТХ-ын даргад илгээсэн албан бичигт “томилохоос татгалзаж байна” гэснээс өөр тодорхой зүйлгүй. Харин олон нийтийн сүлжээнд олон шалтгаан яригдаж байна. Зарим нь “С.Мөнхчулуун төрсөн дүү "ХАР ТАМХИНЫ" хэрэгт холбогдсон тул ЕРӨНХИЙ САЙД ёс зүйн хувьд тохиромжгүй гэж үзсэн” тухай яригдаж байна. Үнэн, худал нь үл мэдэгдэх энэ шалтгаан мэдээж хоёр талтай. Нэг талаас Ерөнхий сайд ёсзүй шаардах нь зүйтэй. Нөгөө талаас ЖДҮХС-гийн зээлтэй нэр холбогдсон нөхөд түүний тойрон хүрээлэгч дунд цөөнгүй бий. Тэгэхээр өөрийн толгой дээрх бухлыг хараагүй атал хүний толгой дээрх өвсийг харсан хэрэг болно. Ямар ч шалтгаантай байсан, Ерөнхий сайд хуулийн хугацаанд тулган С.Мөнхчулуунаас татгалзлаа.
Тэгвэл хэн хотын дарга болох вэ? Ерөнхий сайд НИТХ-ын дарга С.Амарсайханыг дахин зүтгүүлэх үү. С.Амарсайхан МАН-ын Удирдах зөвлөлийн 100 хувийн дэмжлэгийг авч гарч ирсэн. Товчхондоо эрх баригчдын бодлого. Гэвч НИТХ-ын танхимд хоёронтоо унасан. Эхний санал хураалтаар М.Мөнхчулуун, С.Амарсайхан нарын санал тэнцсэн. Дахин санал хураалтад тэр С.Мөнхчулуунд ялагдсан. Тэгэхээр хоёронтоо гээд хэлчихэд буруудахгүй биз. Эрх баригч намын бодлогоор гаргаж ирсэн нэр дэвшигч НИТХ-ын босгыг давалгүй үлдсэн нь энэ. Тэгэхээр одоо МАН-ын дарга У.Хүрэлсүх НИТХ-ын төлөөлөгчдөд “түүнийг дэмж” гэсэн даалгавар өгч, С.Амарсайханыг дахин зүтгүүлэхийг үгүйсгэх аргагүй. Намайг болоод намын бодлогыг дэмжихгүй бол... хэмээн айлган сүрдүүлэх дуртай Ерөнхий сайд энэ удаа НИТХ-ыг “хүчиндэхийг” байг гэх газаргүй.
Хотын даргын томилгоо бол Ерөнхий сайдын бүрэн эрхийн асуудал. Товчхондоо МАН-ын дарга, Ерөнхий сайд У.Хүрэлсүхийн мэдлийн томилгоо. МАН-ын даргын хувьд тэр нэр дэвшүүлж, Ерөнхий сайдын хувиар батламжилна. Тэгэхээр У.Хүрэлсүхэд таалагдах хүн л хотыг удирдах эрхтэй болно гэсэн үг.
Хотын дарга асан С.Батболд өнгөрсөн оны 12 дугаар сарын 10-нд ажлаа өгсөн. Түүнээс хойш аль хэдийнэ хоёр сар өнгөрсөн. Улаанбаатар хот даргагүй дахиад сарын хугацааг ч өнгөрөөж болзошгүй. Тэгэхээр Ерөнхий сайд аа, нийслэлээ хурдхан удирдлагатай болго. Дулаан цаг ирж, ид ажлын улирал эхэллээ. Зам харгуйгаас эхлээд энэ хотод шийдэх асуудал мундахгүй олон бий.
Угаас танд таалагдах, таны хүн энэ хотыг удирдах нь тодорхой. Үүнийгээ ч С.Мөнхчулуунаас татгалзсанаараа хангалттай харууллаа. Одоо цаг алдалгүй өөрийн хүнээ оруулж ирж, Улаанбаатар хотын даргатай болгож өгнө үү.
М.Болд