Засгийн газрын ээлжит бус хуралдаан боллоо. Хуралдаанаар С.Зориг агсны амийг хөнөөсөн хэргийг шийдвэрлэсэн асуудлаар мэдээлэл сонссон байна. Энэ талаар Шадар сайд Ө.Энхтүвшин сэтгүүлчдийн асуултад хариулав.
-Засгийн газрын хуралдаанаар ямар нэг шийдвэр гаргасан уу?
-Засгийн газар шийдвэр гаргахгүй. Хуулийн байгууллагын ажил. Энэ олон жилийн турш хэргийг шалгах явц яаж явагдсан, ямар хууль зөрчсөн талаар ХЗДХ-ийн сайд Ц.Нямдорж танилцуулга хийж, мэдээлэл сонслоо.
-Эрүүдэн шүүсэн талаар бичлэгийг үзүүлсэн үү?
-Хэргийг эрүүдэн шүүсэн талаар бичлэгийг прокурор одоохондоо зөвшөөрөхгүй байгаа юм байна. Гэхдээ үүнийг үзэх ёстой. Үнэхээр эрүүдэн шүүж, хэргийг хилсээр хүлээлгэсэн бол байж болохгүй асуудал.