Хараат бус бие даасан “Сант марал” сан жил бүр Монгол Улсын нийгэм, улс төр, эдийн засгийн байдлын судалгааг нийтэд танилцуулдаг уламжлалтай. Уг судалгаанд иргэдийг санамсаргүй түүврийн аргаар сонгож, хамруулдаг юм. Жил бүрийн судалгаанаас иргэд “Хамгийн нэр хүндтэй улс төрч”-ийг шалгаруулах асуумжид ихээхэн анхаарал хандуулдаг нь харагддаг.
Улаанбаатар хотод улстөрчдийн рейтингийг Ерөнхий сайд У.Хүрэлсүх 24.9 хувиар тэргүүлж байна. Түүний араас Ерөнхийлөгч Х. Баттулга 22 хувь, ЗГХЭГ-ын дарга Л.Оюун-Эрдэнэ 20.7 хувиар удаалж байна.
Тэдний араас УИХ-ын гишүүн Ж.Батзандан 14.2 хувь, БНН-ын дарга Б.Жаргалсайхан 11.1 хувь, МАХН-ын дарга Н.Энхбаяр 9.6 хувь, УИХ-ын гишүүн С.Жавхлан 6.7 хувь, АН-ын дэд дарга Р.Амаржаргал 5.8 хувь, МАХН-ын дэд дарга С.Ганбаатар 4.7 хувь, УИХ-ын гишүүн Т.Аюурсайхан 4.5 хувийн саналаар жагсчээ.
Харин хөдөө орон нутагт хамгийн нэр хүндтэй улстөрчөөр Ерөнхийлөгч Х.Баттулга нэрлэгдсэн байна. Тухайлбал Архангай аймагт Ерөнхийлөгч Х.Баттулга 26.2 хувиар тэргүүлсэн байна. Түүний араас Монгол Улсын гурав дахь Ерөнхийлөгч Н.Энхбаяр 24.6 хувь, Ерөнхий сайд У.Хүрэлсүх 20.0 хувийн саналаар удаалжээ.
Мөн Дорноговь аймагт Ерөнхийлөгч Х.Баттулга 27.1 хувийн саналаар тэргүүлж, Ерөнхий сайд У.Хүрэлсүх 22.9 хувь, ЗГХЭГ-ын дарга Л.Оюун-Эрдэнэ 18.6 хувийн санал авсан байна.
Тэгвэл Булган аймагт явуулсан асуулгаар уг жагсаалтыг Ерөнхий сайд У.Хүрэлсүх 33 хувийн саналаар тэргүүлсэн бол Ерөнхийлөгч Х.Баттулга 18.0 хувь, ЗГХЭГ-ын дарга Л.Оюун-Эрдэнэ 16.0 хувийн санал авчээ. Дорнод аймагт ч Ерөнхий сайд У.Хүрэлсүх 30 хувийн саналаар тэргүүлжээ. Түүний араас Ерөнхийлөгч Х.Баттулга 25 хувь, МАХН-ын дарга Н.Энхбаяр 17.5 хувь, ЗГХЭГ-ын Л.Оюун-Эрдэнэ 17.5 хувийн саналаар жагссан байна.
Сэлэнгэ аймагт явуулсан асуулгаар Ерөнхийлөгч Х.Баттулга 28.5 хувь, Ерөнхий сайд У.Хүрэлсүх 25 хувь, Л.Оюун-Эрдэнэ 25.0 хувийн санал авсан бол Завхан аймагт Ерөнхий сайд У.Хүрэлсүх 18.8 хувь, Л.Оюун-Эрдэнэ 17.5 хувь, Ц.Нямдорж 12.5 хувийн санал авчээ.
Судалгаанаас харахад Ерөнхийлөгч Х.Баттулга рейтингээрээ Архангай, Дорноговь, Сэлэнгэ аймагт тэргүүлсэн бол Ерөнхий сайд У.Хүрэлсүх Улаанбаатар, Булган, Дорнод, Завхан аймагт тэргүүлж, энэ жилийн хамгийн нэр хүндтэй эрхмээр тодорчээ.
Дээрх бүх асуулгын нэгтгэсэн дүнгээр Монгол Улсын Ерөнхий сайд У.Хүрэлсүх тэргүүлж, удаах байранд Ерөнхийлөгч Х. Баттулга орсон бол ЗГХЭГ-ын дарга Л.Оюун-Эрдэнийн нэр хүнд огцом өсч, “ТОП 3”-т багтжээ.
Б.Дэлгэрцэцэг