ОХУ, Украины дунд дахин маргаан дэгдлээ. Энэ талаар “ВВС” болон “www.dailymail.co.uk” сайт мэдээллээ.
ОХУ-ын Ерөнхийлөгч В.Путин улс төрийн хүндхэн байдлаас болж, хэцүүхэн амьдарч буй Украины ард түмэнд ихээхэн анхаарал хандуулах болсон нь олны анхаарлыг зүй ёсоо татаж байна. Ерөнхийлөгч Путин ганцхан долоо хоногийн дотор украинчуудыг хооронд нь зөрчилдүүлж болохоор мэдэгдэл хийлээ.
Тэрбээр өнгөрөгч долоо хоногт Украинаас салан тусгаарласан нь Донецк, Луганск мужийн иргэдэд ОХУ-ын паспорт олгох зарлигт гарын үсэг зуржээ. “Оросын салан тусгаарлагчид” гэж нэрлэсэн зэвсэгт босогчид 2014 оны эхээр Украины зүүн хязгаарт хяналтадаа тогтоож, тусгаар улс байгуулсан билээ.
Украины Ерөнхийлөгч Петро Порошенко салан тусгаарлагчдад алдсан газар нутгаа эргүүлэн авахаар хэсэг хугацаанд тэмцэлдсэн ч ялагдал хүлээсэн гэхэд хилсдэхгүй. Путины дээрх зарлигын дагуу Украины зүүн хязгаарт амьдарч буй 3.2 сая иргэн ОХУ-ын иргэн болох нь тодорхой боллоо.
Кремлийн тэргүүн дээрх шийдвэрээсээ хэдхэн өдрийн дараа украинчуудад хандсан хоёр дахь ноцтой мэдэгдэл хийв. Тэрбээр БНХАУ-ын нийслэл Бээжин хотноо болсон “БҮС ба ЗАМ” уулзалтын үеэр “Украины бүх иргэдэд ОХУ-ын иргэншил санал болгох тухай хэлэлцэж эхэлсэн. Хэрвээ уг асуудалд дэмжигдэж, ажил хэрэг болбол украинчуудад паспорт олгох, бүртгэлжүүлэх үйл явц түргэвчилсэн журмаар хэрэгжих болно” гэж мэдэгджээ.
ОХУ, Крымийг хойгийг эх газартаа хүчээр нэгтгэсний дараахан олон жил ах, дүүсийн харилцаатай байсан МОСКВА-КИЕВ гэнэтхэн л дайснууд болж хувирсан юм.
Хоёр улсын харилцаа хөндийрч, муудсан ч Ерөнхийлөгч Путин Украинтай зөрчилдөхөөс үргэлж болгоомжилж, төвийг барьсан байр сууриа хадгалж байв. 2019 он гараад тэрбээр төвийг сахих байр сууриа өөрчилж, “Украиныг аажмаар ОХУ-д уусгах” бодлогоо танилцууллаа.
Путины явуулж буй улс төрийн шийдвэр Тайванийг БНХАУ-д нэгдэхээр тэмцэж буй Си Зиньпинийн арга барилтай тун төстэй харагдаж буй гэхэд болно.
Цэнхэр гаригийн гол тоглогч Путины гэнэтийн мэдэгдэл Украинчуудыг багагүй сандаргасан ба Путины дэмжигчид болон, үл дэмжигчид хоёр хуваагдахад хүрчээ. Украины хэвлэлүүд “Путин нэг гүрнийг гутаан доромжилсон, цэрэг, зэвсгийн хүчээр Украиныг эзлэн түрэмгийлэхээс санаархаж байна” гэж буруутгажээ.
2014 онд эхэлсэн зөрчилдөөний үеэр 13 мянган иргэн амь үрэгдэж, хоёр сая иргэн эх орноосоо дүрвэсэн юм.
Путины мэдэгдлийн хариуг Украины шинэхэн Ерөнхийлөгч хэрхэн барих нь олны анхаарлыг зүй ёсоор татав.
Улс төрийн туршлагагүй ч ард түмнийхээ дэмжлэгээр нэг л мэдэхэд улсынхаа номер нэг эрхэм болоод буй Владимир Зеленский фэйсбүүк хуудастаа “Таны мэдэгдлийг сонслоо. Багагүй цочирдлоо. Хүн бүхэн биднийг харж, ажиглаж байгаа. ОХУ-д тайван жагсаал хийснийхээ төлөө баривчлагдах нь бий. Украин бол үг хэлэх эрх чөлөөтэй, чөлөөт хэвлэлтэй, нээлттэй интернэттэй орон юм. ОХУ-тай бүх шатны яриа хэлэлцээр хийхэд бэлэн. Гэхдээ Крым, Донбассыг эргүүлэн өгсөн цагт л яриа хэлэлцээр хийнэ” гэж мэдэгджээ.
Тэрбээр кампанит ажлынхаа үеэр ОХУ-тай харилцаагаа сайжруулахаа амлаж байсан ч ийнхүү талаар өнгөрөв. Путин, Зеленскийд одоо хүртэл Ерөнхийлөгч болсонд нь баяр хүргээгүй юм.
Хэдхэн өдрийн дараа эрх мэдлээ дараагийн хүндээ шилжүүлэн өгөх Украины Ерөнхийлөгч Порошенко энэ удаа чимээгүй байхыг хүссэнгүй.
Порошенко “Бидний өмнө тэд Крымийг эх газартаа хүчээр нэгтгэсэн. Гэтэл одоо Донбассыг өөртөө нэгтгэж, газар нутгаа тэлэхээр санаархаж байна. Энэ удаа бид зүгээр хараад суухгүй” гэж мэдэгдлээ.
НҮБ, Европын холбоо, АНУ, Их Британи улс Путины мэдэгдэлд дургүйцлээ илэрхийлж, “Украины газар нутаг, тусгаар тогтнолд заналхийлсэн ямар ч үйлдлийг уучлахгүй, шаардлагатай гэвэл хариу арга хэмжээ авах”-аа сануулаад байна.
ОХУ-ын эрх баригчид 2002 оны гуравдугаар сард Гүржээс салан тусгаарласан Абхаз, Өмнөд Осетийн оршин суугчдад ОХУ иргэний харьяалалаа олгосон түүхтэй. Москва 11 жилийн өмнө дээрх иргэдээ хамгаалах зорилгоор, Гүрж улсын эсрэг зэвсэг барин тэмцсэн билээ.
Б.Дэлгэрцэцэг