МАНАН дэглэмийн эсрэг монгол түмний нэгдэл, Эрс шинэчлэл хөдөлгөөн, Хохирогчдын нэгдсэн холбооноос өнөөдөр АТГ-ын гадаа цуглаан хийж, Х.Энхжаргалыг огцрохыг шаардлаа.

Тэд АТГ-ын дарга Х.Энхжаргалыг ард түмний язгуур эрх ашигт сөргөөр нөлөөлсөн шийдвэрийг гаргасан хэмээн мэдэгдлээ. Тэгвэл Х.Энхжаргал ямар хууль бус шийдвэр гаргасан вэ гэсэн сэтгүүлчийн асуултад Хохирогчдын нэгдсэн холбооны тэргүүн Х.Оюунцэцэг “Оюутолгой, Дубайн гэрээгээр халхавчилж, эс үйлдэхүйгээр Монголын ард түмний эсрэг үйлдэл хийсэн. Энэ том гэрээнүүд дээр асуудлыг булзайруулж, цайруулсан. АТГ шалгах үүргээ гүйцэтгэхгүй байгаа” хэмээн түгдэчлээ.

Товчхондоо тэмцэгчид Х.Энхжаргал гэх хүнийг ямар шалтгаан, үндэслэлээр огцруулахаар цугласнаа хэвлэлийнхэнд тайлбарлаж чадсангүй. Тэдэнд Оюутолгойн гэрээнээс өөр шалтгаан олдоогүй бололтой.

АТГ-ын дарга Х.Энхжаргалыг чөлөөлөх асуудлыг Хуульзүйн байнгын хорооны энэ долоо хоногийн хуралдаанаар хэлэлцэнэ. Үүний өмнөхөн ард түмний нэр барьсан “тэмцэгчид” маань гудамжнаас үгээ хэллээ.

М.Болд