УИХ-ын чуулганы үдээс хойшхи нэгдсэн хуралдаанаар Монгол Улс дахь хүний эрхийн байдлын талаарх 18 дугаар илтгэлийг сонслоо. Илтгэлийг ХЭҮК-ийн дарга Ж.Бямбадорж танилцууллаа. Байнгын хорооны дүгнэлтийг сонссоны дараагаар гишүүд асуулт тавьж, үг хэлэв.
УИХ-ын гишүүн Б.Бат-Эрдэнэ:
-Монголын нийгмийн байдал дэндүү хүнд байна. Өдөр бүр л хүн амиа алдаж байна. Хэрэг нь амиа хорлосон гэдэг тайлбартай хаагддаг. Ар талд нь үр хүүхдээ алдсан эцэг, эхийн зовлон шаналал, гомдол үлддэг. Үүнийг бид өдөр бүр зүрх шимшрэн сонсож байна. Хүүхдийн хулгай, хүчирхийлэл, амь насыг нь хөнөөж байна. Хамгийн сүүлд л гэхэд өөрийнх нь нагац хүүхдийн хуруу цавчиж байна. Энэ байдалд ямар арга хэмжээ авах вэ?
ХЭҮК-ийн дарга Ж.Бямбадорж:
-Энэ илтгэл нөхцөл байдлыг л үнэлж дүгнэдэг. Өнгөрсөн жилийн илтгэлд эрүүл, аюулгүй орчинд амьдрах асуудлаар дөрвөн чиглэлээр зөвлөмж гаргасан. Уул уурхайн бизнес ба хүний эрхийн асуудлаар хүний эрхийн комисс олон улсын хэмжээний хурал хийхэд иргэдийг оролцуулсан.
УИХ-ын гишүүн Н.Учрал:
-Хүүхэд хамгаалах чиглэлээр хуулийн төслийг боловсруулсан. Энэ хуулийн төслийг хэлэлцэн батлах хэрэгтэй. Хүүхдийг контентоос салгах хэрэгтэй. Хүүхдийн хажууд телевизээ асаахаас айдаг болж байна.
ХЗДХ-ийн сайд Ц.Нямдорж:
-ХЭҮК-ийн илтгэлийг сонслоо. Тодорхой ажлууд хийгдсэн, хуулийг шинэчлэх төсөл явагдаж байгаа. Хоёр, гурван жилийн маргаан дагуулаад байгаа асуудалд шулуухан байсан нь дээр. Би өөрийгөө магтаад байгаа юм биш. Энэ асуудал руу би анхаарал хандуулж яриагүй бол эрүүдэн шүүлт нуугдаад дуусах байсан. Энэ хоёр иргэн хилсээр ял эдлээд шоронд дуусах байсан. Т.Чимгээ, Б.Содномдаржаа нарыг яаж цагаатгаж, суллах вэ?
Улсын Ерөнхий прокурорын орлогч М.Чинбат:
-Энэ хэрэг дээр УДШ хяналтын шүүхээр хэлэлцээд шийдвэр гаргасан нь хүчин төгөлдөр байгаа. Шинээр нөхцөл байдал илэрвэл прокурор хүсэлт гаргаад УДШ-ийн Хяналтын шатны шүүхэд өгнө. Шүүх л шийдвэр гаргана. Мөрдөх байгууллагаас шинээр илэрсэн нөхцөл байдал гэж материал бидэнд ирээгүй.
Ийнхүү гишүүд байр сууриа хэллээ. Хүүхдийг гэмт хэрэг зөрчлөөс урьдчилан сэргийлэх чиглэлээр арга хэмжээ авч ажиллаж байгаа. Хүүхэд сураггүй алга болох чиглэлээр төрийн болон төрийн бус байгууллагатай хамтарч ажиллаж байна. Шинээр бүтэц бий болгосон. Сургуулийн орчимд эргүүлийг тодорхой хугацаагаар ажиллуулж байна. С.Зоригийн амь насыг хохироосон асуудлыг шийдвэрлэхдээ Б.Содномдаржаа, Т.Чимгээ нарыг эрүүдэн шүүсэн асуудалд ЦЕГ эрүүгийн хэрэг үүсгэн шалгаж байгаа юм байна. Шуурхай шийдвэрлэнэ гэдгээ хуулийн байгууллагынхан хариуллаа. УИХ-ын гишүүн Ж.Батзандан "Т.Чимгээ, Б.Содномдаржаа нарыг уучлах байтугай цагаатгах ёстой₮ гэдгийг хэлсэн үгэндээ онцоллоо.
Н.Энх