БНХАУ-ын харилцаа холбооны “Huawei” компанийн ухаалаг гар утсуудыг зах зээлд борлуулах ажил багагүй хүндрэлтэй учраад буй талаар "www.dailymail.co.uk" сайт мэдээллээ.
Учир нь томоохон компаниуд “Huawei”-ийн гар утас болон бусад бараа бүтээгдэхүүнийг нь АНУ-ын Засгийн газраас сэрэмжлүүлж буйгаар тагнуул хийдэг хэмээн үзэж, худалдахаас татгалзаж эхэлжээ.
Одоогоор Япон, Тайвань, Их Британийн гар утасны компаниуд “Huawei”-ийн шинэ загварын ухаалаг гар утасны урьдчилсан захиалгын хүргэлтийг цуцалсан гэнэ.
Мөн шинээр "5G" сүлжээнд суурилсан гар утаснуудыг хэрэглэгчдэд санал болгох төлөвлөгөөгөө түдгэлзүүлсэн байна.
Вашингтон, БНХАУ-ын эрх баригчидтай нягт холбоотой ажиллаж, олон улсад тархан тагнуул хийдэг хэмээн “Huawei”-ийг буруутгаж, хатуу хориг арга хэмжээ авчээ.
Цагаан ордны тэргүүн Дональд Трамп өнгөрөгч долоо хоногт “Huawei”-ийг хар жагсаалтадаа оруулсан бол өчигдөр БНХАУ-ын нөлөө бүхий таван компанийг уг жагсаалтад оруулахаар төлөвлөж буйгаа зарлалаа.
Үүнд “Megvii”, “Dahua Technology”, “Hikvision” зэрэг хяналтын камер нийлүүлдэг компаниуд багтжээ. Нүүр царай таних системд суурилсан “Hikvision” болон “Dahua”-ийн камеруудыг тагнуулын зорилгоор ашиглаж болзошгүй гэж сэжиглэж буй гэнэ.
Б.Дэлгэрцэцэг
Уншиж байна |