УИХ-ын гишүүн Ж.Батзандан, Л.Болд нар өнөөдөр (2019.05.31) ШШГЕГ-ын харьяа 401 дүгээр хорих ангид очиж, Т.Чимгээ, Б.Содномдаржаа хоёртой уулзлаа. Тэд уулзалтын дараа сэтгүүлчдэд мэдээлэл өгөв.
- Т.Чимгээ, Б.Содномдаржаа нарын биеийн байдал ямар байна вэ?
-Түр хорооны хоёр гишүүн өнөөдөр Т.Чимгээ, Б.Содномдаржаа нартай ганцаарчилсан уулзалт хийлээ. Т.Чимгээгийн биеийн байдал нэлээн тааруу байна. Цус алдалтын байдалтай, олон сар шулуун гэдэснээс нь цус алдаж байна гэсэн мэдээллийг өглөө. Нэлээн тамирдуу байна. Хорих ангийн эмч, дарга нарт энэ асуудлыг ярилаа. Хүүний хүүхдийг хилсээр хэлмэгдүүлчихээд амийг нь битгий авчихаарай гэж хатуухан хэллээ. Ойрын хугацаанд нарийн шинжилгээнд оруул гэсэн чиглэл өглөө. Хорих ангийн удирдлагууд эрүүл мэндийн үйлчилгээнд анхаарна гэдгээ хэллээ. Б.Содномдаржаагийн биеийн байдал ч сайн биш байна. Нэлээн ядарсан, цөхөрсөн шинжтэй харагдаж байна.
-Эмчилгээ хийгдэж байна уу?
-Эмчилгээ хийж байгаа гэсэн ч энэ ангийн эмчилгээний чанар хангалттай биш нь харагдаж байна.
-Та бүхэн уулзалт хийлээ. Одоо ямар арга хэмжээ авах вэ?
-Монгол Улсын гэм зэмгүй хоёр иргэн С.Зориг агсны амь насыг хөнөөсөн хэрэгт хилсээр хэлмэгдэж, хоригдож байгааг түр хороо олон баримтаар тогтоож байна. Түр хорооны долоон гишүүн олон хүнтэй уулзсан. Өмгөөлөгч нараас эхлээд гэр бүлийн хүмүүстэй уулзаж, хэргийн материалтай танилцаж байна. Т.Чимгээ, Б.Содномдаржаа хэлмэгдсэн хүмүүс. Шинээр илэрсэн нөхцөл байдлын хүрээнд Т.Чимгээ, Б.Содномдаржаа хоёрыг нэн даруй суллуулж, цагаатгахын төлөө ажиллана.
ШИНЭ-ээс өнөөдрөөс Т.Чимгээ, Б.Содномдаржаа нарыг суллуулах нийт ард түмний хөдөлгөөн өрнүүлж эхлэхийг УИХ-ын гишүүн Л.Болд хэллээ.
Б.Болд