Кыргызстаны Ерөнхийлөгч Сооронбай Жээнбеков Монгол улсын Ерөнхийлөгч Х.Баттулгатай өргөтгөсөн уулзалт хийх үеэрээ Кыргызстан улс Монголын уул уурхай болон цахимжуулах салбарын туршлагыг сонирхож байгаагаа илэрхийлжээ.
“Кыргызстан ашигт малтмалаар баян, мөн энэхүү баялгийг үр ашигтай олборлон борлуулах нь эдийн засгийн чухал чиглэлүүдийн нэг. Үүний зэрэгцээ байгаль орчноо хамгаалах талаар анхаарах нь чухал.
Монгол улсад уул уурхайн үйлдвэрлэл хөгжиж байгааг бид ихэд сонирхон ажиглаж байдаг. Энэ салбар дахь танай туршлага бидэнд сонирхолтой байна. Тиймээс байгалийн нөөцийн үр ашигтай удирдлага, ашиглалтын талаар санал бодлоо солилцоход бид бэлэн” хэмээн Жээнбеков өгүүлжээ.
Түүнчлэн Кыргызстанд зарлагдсан цахимжуулалтын жилийн хүрээнд 2023 он хүртэл тоон шилжилтийн концепцийг хэрэгжүүлэх нь нэн тэргүүний зорилт болж байгааг Жээнбеков онцоллоо.
“Монгол улс цахимжуулалтын хөтөлбөр зарласан. Үүнтэй холбоотойгоор бид энэ чиглэлд туршлага солилцох сонирхолтой байна” хэмээн Жээнбеков өгүүлжээ. Үүний хариуд Ерөнхийлөгч Х.Баттулга Монголд хэрэгжээд хэдэн жилийн нүүрийг үзсэн “тоон НӨТ”-ийг нэвтрүүлэх туршлагаа дуртайяа хуваалцана гэдгээ илэрхийлсэн байна.
Төмөр замаа Кыргызстан-Хятадын хил хүртэл тавихыг санал болгов
Хоёр ерөнхийлөгч уулзах үеэр Ерөнхийлөгч Х.Баттулга Монгол улс Шинжаан-Уйгурын автономт тойргийг Монголтой холбох төмөр зам барьж байгаа талаар ярьсны дээр энэ төмөр замыг Кыргызстан -Хятадын хил хүртэл сунгахыг санал болгосон байна. Ингэснээр Кыргызстанд “дорнын том зах зээлд гарах боломжтой болно” гэжээ.
Түүнчлэн Монгол, Кыргызстаны бараа эргэлтийн талаар дурьдаад хоёр орон худалдаа эдийн засгийн хамтын ажиллагаагаа хөгжүүлэхэд дээд зэргээр хүчин чармайлт гаргах шаардлагатай хэмээжээ. Үүний хариуд Кыргызстаны Ерөнхийлөгч энэ оны есдүгээр сард болох Засгийн газар хоорондын комиссын хуралдааны хүрээнд хоёр орны бизнес хүрээллийнхэний бизнес форум зохион байгуулахыг санал болгосон байна.
Г.Бямбасүрэн