Баянзүрх дүүргийн нутаг дэвсгэр Дүнжингаравын зүүн урд замд өнөөдөр буюу 2019.08.29-ны 03.00 цагийн орчимд "Субару импреза" маркийн автомашин онхолдож 2 эмэгтэй, 1 эрэгтэй нас барсан ноцтой осол хэрэг гарлаа.
Осолд өртөгсөд залуучууд байсан бөгөөд одоогоор согтууруулах ундааны зүйл хэрэглэсэн эсэх нь тогтоогдоогүй Баянзүрх дүүргийн цагдаагийн хэлтэст шалгалтын ажиллагаа явагдаж байгаа аж. Урьдчилсан байдлаар автомашины моторын хүчээ үзэн уралдаж байгаад осолдсон болох нь тогтоогджээ.
Спорт болон нэмэлт тоноглолтой тээврийн хэрэгслээр хотоос зайдуу замд зориулалтын бус зам, талбайд дрифт хийх, тээврийн хэрэгслийн хурд, хүчийг үзэх бусдын амгалан тайван байдлыг алдагдуулж өөрийн болон бусдын амь нас, эрүүл мэндэд эрсдэл учруулах зөрчил ихээр бүртгэгдэх болсон гэдгийг ТЦА-наас мэдээлж байна.
Иймд эцэг, эх, асран хамгаалагч нар өөрийн үр хүүхдээ шөнө оройн цагаар хаана, хэнтэй юу хийж байгаа тал дээр хяналт тавьж анхаарал халамжаа сайжруулах шаардлагатай юм.
Урин дулааны цагт спорт автомашин сонирхогч залуус шөнийн цагаар нийслэлийн гудамж замд дрифт хийж, стандарт бус яндан суурилуулж дуу чимээ гарган иргэдийн амар тайван байдлыг алдагдуулах зөрчил ихээр бүртгэгддэг байна.
Монгол Улсын Замын хөдөлгөөний аюулгүй байдлын тухай хуулийн 10.1-д “Улсын стандарт шаардлагыг хангасан үзүүлэлт бүхий тээврийн хэрэгслийг Монгол Улсад ашиглахыг зөвшөөрнө”, мөн Монгол Улсын Замын хөдөлгөөний дүрмийн 2-р хавсралтын 4.3-д “Яндан, дуу намсгуур ажиллахгүй буюу байхгүй болсон, зориулалтын бус дуу намсгууртай автомашин ашиглахыг хориглоно” гэж тус тус заасан байдаг.
Мөн “Авто тээврийн хөдлөх бүрэлдэхүүний эргономикийн үзүүлэлтүүд” MNS 4599:2003 стандартад тээврийн хэрэгслийн утааны яндангаас гарах дуу чимээний зөвшөөрөгдөх түвшин суудлын автомашин бензин хөдөлгүүртэй бол 74, дизель бол 75 Дб /децибалл/-аас тус тус хэтрэх ёсгүй гэж тогтоосон.
Дээрх хууль, дүрэмд заасны дагуу утааны яндангаас гарах дуун хэмжээ хэтэрсэн тээврийн хэрэгслийг нэг бол дуу намсгагч /глушитель/ ажиллахгүй болсон, эсвэл зориулалт бусаар өөрчилж тоноглосон гэж үзэж Монгол улсын Зөрчлийн тухай хуулийн 14 дүгээр зүйл 14.7 дахь хэсгийн 14.7.15-д заасныг үндэслэн хүнийг 20,000 төгрөгний, хуулийн этгээдийг 200,000 төгрөгний бэлэн бус торгуулийн шийтгэл ногдуулна.
Г.Сүрэн
Уншиж байна |