УИХ-ын чуулганы нэгдсэн хуралдаанаар Үндсэн хуульд нэмэлт өөрчлөлт оруулах төслийн хоёрдугаар хэлэлцүүлгийг хийж байна. Хэлэлцэж байгаа асуудалтай холбогдуулан гишүүд асуулт тавьж, хариулт авч байгаа юм. 

УИХ-ын гишүүн Ж.Батзандан:

-Улс төрийн нам улсын хэмжээнд үйл ажиллагаа явуулна гэсэн заалтыг эсэргүүцэж байгаа. Энэ бол баг дээр, сум болгонд намын хороо байгуул гэсэн агуулга юм. Монголчууд  цаашдаа нам төвтэй нийгэм рүү явах уу, иргэн төвтэй нийгэм байгуулах уу. Монголчуудыг намаар нь хагаралдуулдаг, намчирхсан нийгэм рүү явж болохгүй. 

Төрийн байгуулалтын байнгын хорооны дарга С.Бямбацогт:

-Д.Лүндээжанцан нарын 62 гишүүний өргөн барьсан төсөлд нам улсын хэмжээнд үйл ажиллагаа явуулна гэж заасан байгаа.Гэтэл үүнийг гэнэт ороод ирсэн зүйл шиг яриад байна. Улсын хэмжээнд үйл ажиллагаа явуулах бодлого хөтөлбөртэй байна гэдгийг ойлгох хэрэгтэй. Энэ нь 330 сум 1500 баг хороонд салбартай байна гэсэн үг биш. Үүнийг мушгиж ярьж болохгүй. 

УИХ-ын гишүүн Ж.Мөнхбат:

-Үндсэн хууль өөрчилнө гэдэг үндэсний зөвшилцлийн нэг. Энэ хүрээнд зөвшилцөл явагдаж байгаа. Монгол Улс үндэсний хэмжээнд нам төвтэй нийгэм рүү явахаар хөндөгдөж байна. УИХ-ын чуулганы 10:30 цагт эхэлсэн. Гэтэл одоо үдийн цайны цаг болжээ. Нэг санал хураалт дээр үд хүргэж байна. Тиймээс 150 санал хураалт явуулахад хоёрдугаар хэлэлцүүлэг 60-70 хоног үргэлжлэх нь. Давхцахгүйгээр саналаа хэлвэл зүгээр байна гэж хэлмээр байна. 

УИХ-ын гишүүн Б.Бат-Эрдэнэ:

-"Төрж байгаа хүүхдийн хонгон дээр намын тамга тавих дутлаа" гэж Д.Пүрэвдорж гуай хэлсэн байдаг. Намын хатуу гишүүнчлэлээс татгалзах хэрэгтэй. Иргэдийн эвлэлдэн нэгдэх эрхийг нь боомилж, хязгаарлаж байгаа нь болохгүй. 

УИХ-ын дарга Г.Занданшатар:

-Энэ заалт орж байж системтэй болж байгаа юм. Улсын хэмжээнд гэдгийг баг суманд байна гэж тайлбарлаад байх юм. Улсын хэмжээний асуудлаар үйл ажиллагаа явуулна гэсэн агуулга байгаа юм. 

Чуулганы хуралдаан үргэлжилж байна. 

Н.Энх