Энэ өдрүүдэд НҮБ-ын Ерөнхий ассамблейн 74 дэх чуулган үргэлжилж байна. Энэ чуулганы үеэр дэлхийн улс орнуудын төрийн тэргүүнүүдийн хэлсэн үг олон улсын анхаарлын төвд байгаа юм.
Тэдгээрийн нэг болох, АНУ-ын Ерөнхийлөгч Дональд Трамп мягмар гаригт НҮБ-ын Ерөнхий ассамблейн чуулганд үг хэлэхдээ "АНУ цаашид Хятадын худалдааны практиктай эвлэрэхгүй, Хятадтай хийх "муу хэлэлцээр"-ийг хүлээн авахгүй" хэмээн мэдэгдсэн юм. Түүнчлэн БНХАУ Хонгконг дахь эсэргүүцлийн ажиллагааг хэрхэн "дарж" байгааг дэлхий нийт харж байгаа хэмээн сануулж байв.
Ийнхүү шүүмжилсний хариуд лхагва гаригт БНХАУ-ын Гадаад хэргийн сайд мөн л НҮБ-ын индэр дээрээс мэдэгдэл хийлээ.
Тодруулбал, АНУ Хятадын худалдаа, хөгжлийн загварыг шүүмжилсний хариу болгон БНХАУ-ын Гадаад хэргийн сайд Ван И мэдэгдэл хийж, Хятадын тусгаар тогтнолыг хүндлэх ёстой хэмээн анхааруулжээ.
Тэрбээр НҮБ-ын Ерөнхий чуулганы индэр дээрээс ийнхүү АНУ-д анхааруулга өгсөн бөгөөд БНХАУ аливаа аюул заналхийлэл тэр дундаа худалдааны салбарын заналхийллийн өмнө сөхрөхгүй гэж онцолсон байна.
Үүний зэрэгцээ ирэх сард болох хоёр орны өндөр түвшний худалдааны хэлэлцээрүүд эерэг үр дүн авчирна гэдэгт найдаж байгаагаа илэрхийлжээ.
Түүнчлэн, өдгөө "худалдааны дайн"-тай байгаа талууд харилцан ашигтай байх дээр үндэслэн хамтран ажиллах хэрэгтэй гээд дэлхийн хоёр том эдийн засгийн хоорондын аливаа сөргөлдөөнөөс зайлсхийхийг уриалсан байна.
АНУ болон Хятадын хооронд худалдааны дайн жил гаруй хугацаанд үргэлжилж, энэ хооронд талууд хэдэн зуун тэрбум ам.долларын бараанд харилцан татвар ноогдуулаад байгаа юм.
Хоёр тал худалдааны дайнд цэг тавих үүднээс ирэх сард хэлэлцээр хийхээр тохирсон бөгөөд үүнээс дорвитой үр дүн гарна гэж Хятад найдаж байгаа аж.
Ван И НҮБ-ын индэр дээрээс хэлсэн үгэндээ худалдааны дайн хоёр оронд хоёуланд нь хохирол учруулна гэдгийг санууллаа. Түүнчлэн АНУ БНХАУ-ын хөгжлийн загварыг өөрчлөх эсвэл хоёр эдийн засгийн хоорондын холбоо харилцааг таслах гэж оролдох хэрэггүй хэмээн анхааруулсан байна.
"Заналхийлсэн нөхцөлд эсвэл Хятадын хөгжлийн хууль ёсны эрхийг уландаа гишгэсэн нөхцөлд хэлэлцээр явагдаж болохгүй" хэмээн Ван И цохон тэмдэглэжээ.
Түүнчлэн Хятад улс Америкийг гүйцэж түрүүлэхийг хичээж байгаа гэсэн яриаг тэрбээр няцаалаа.
"Хятад улс дэлхийн тавцан дээр "Хаадын тоглоом"-д тоглох эрмэлзэлгүй. Одоо АНУ дэлхийн хамгийн хүчтэй орон байгаа бөгөөд ойрын ирээдүйд ч тийм байна" хэмээн Ван И мэдэгдсэн байна.
Мөн хоёр орон нэгнийхээ дотоод хэрэгт оролцохгүй, нутаг дэвсгэрийн бүрэн бүтэн байдлыг хангаж, нэг нэгэндээ өөрсдийн хүсэл сонирхлыг тулгахгүй байх зарчмыг баримтлах ёстой хэмээн онцоллоо.
"АНУ хэлсэн үгэндээ байж, Хятадын тусгаар тогтнол, Хонгконгийн хүчирхийллийг зогсоох, эмх журмыг сэргээх гэсэн Засгийн газрын хүчин чармайлтыг хүндэтгэнэ гэж бид найдаж байна" хэмээн Хятадын гадаад хэргийн сайд мэдэгджээ.
Г.Бямбасүрэн